国足热身赛 踢踢白相相

娄一晨

没有体育比赛的日子里，球迷的心空荡荡得厉害。

前两天，我那位球迷友人又来电话了。

友人：喂，老娄啊，勿好意思，我又来烦侬了哦……

我：侬又来啦？哈哈哈……唉，认得侬我属于路道粗噢……讲！

友人也笑：呵呵呵，我就想问侬呀，国家队蹲了上海集训，已经跟上港踢过了，过两天要跟申花踢热身赛，有得转播伐啦？

我：喂，阿哥啊，迭个只是踢白相额训练比赛呀，有啥看头啦？

友人：我晓得是踢踢白相相额比赛。但是，介许多辰光看勿着比赛，阿拉球迷心里厢窝煞勿啦？上两个礼拜申花俱乐部搞个内部对抗赛，有得电视转播，我侪看了！蛮开心哦……

我：各么上个礼拜周末人家德国联赛复工了，侬看了伐啦？要看么也应该看看人家迭种正式比赛呀。

友人：德甲复工我晓得呃。哪能讲法呢？外国人额球踢了是好看，但是感觉总归勿像阿拉看自家额联赛介有咪道呀。再讲了，迭眼外国球员额名字又臭又长，我记啊记勿牢，又勿像侬娄兄对伊拉侪是滚瓜烂熟。呒没办法，阿拉中国人还是欢喜看自家人踢球！呒没正式比赛，看看热身赛也好额……

我叹：唉，阿哥啊，真个是可怜中国球迷心啊……

友人：所以我就想问侬为啥国家队跟申花上港额热身赛勿转播啦？真额像网廊厢讲额是因为国家队怕踢勿过？

我：唉，我啦最讨厌媒体写迭种莫名其妙额分析文章。算啥意思呢？拨我讲起来，迭额两场就是训练比赛，输赢比分根本就呒没意义呃，对伐？讲了难听点，国家队现在迭个辰光搞集训算啥名堂？后头又呒没比赛。世界杯预选赛接下去是啥辰光？早来！要到10月份来！现在集训，训好了之后球员全部回去踢联赛，各么迭趟集训阿是白训了啦？至于讲到怕输拨申花上港，哈哈哈，真是有空噢！喏，别额勿讲，申花队里厢有韩国中锋金信煜，国家队就怕伊一家头？好交好伐！金信煜对中国国家队进过几只球？我印象当中好像只进过一只！

友人：金信煜人长呀，国家队后防线怕呃……

我：再讲上港。2012年国家队跑到巴西踢友谊比赛，0比8输拨巴西队侬还记得伐？（友人称是）当时比赛里厢巴西队就有得奥斯卡、胡尔克，现在侪蹲了上港，要么国家队就是怕伊拉两家头？

友人：各么侬老兄分析，阿拉迭眼媒体为啥要迭能介写啦？

我：哈哈哈，媒体最怕啥？最怕呒没热点呀！现在勿是侪讲究流量吗？呒没热点就是呒没流量！所以，随便哪能要寻出一点热点，哪怕制造出一点热点！侬看，侬老兄勿是就拨圈进来了？

友人：哎哎哎，覅瞎讲八讲，我只是关心是勿是有转播，是勿是有得看。消磨辰光呀！