游园赏鸭品点心

文/许德华

大学舍友辉、萍搭仔我三个人约好退休周游世界。结果受到新冠疫情影响，外国勿好去，外地勿想去，乃末决定就辣上海本地兜白相，第一趟出行去南市城隍庙、逛豫园，尝绿波廊糕点。

比较有趣个是，我搭仔辉侪已经满60周岁，享受到了门票半价优惠，萍却差了20天，只能全票，阿拉开玩笑讲歇脱一歇美食让萍免费，提早分享老年门票优惠。

从前白相豫园急匆匆静勿下来心，现在辰光充足，笃悠悠从会景楼向三穗堂、万花楼、点春堂、玉华堂、内园等景区慢慢欣赏：像“积玉水廊”廊长百米，是江南古典园林里向最长个一条水廊；树龄四百多年个银杏树高达21米，相传是建园主人亲手种植嗰；“点春堂”之名出自北宋大词人苏东坡笔下“望长安路，依稀柳色，翠点春妍”，当年旅居上海个广东商人刘丽川领导“上海小刀会”起义反抗清朝搭仔外国侵略，现在点春堂还陈列着起义军使用个武器、自铸个钱币，以及发布个文稿等等。镇园之宝“玉玲珑”同苏州冠云峰、杭州绉云峰并称江南三大名峰。

老早就看到过豫园里大花金鱼，搿歇池塘里又添了四只凤头白鸭，据说伊属于“珍稀古禽”，头顶一簇白羽就像凤凰一样好看高贵，清朝皇家园林里就养过搿种观赏鸭，后来侪下落不明了。亏得前两年江苏省镇江科研机构辣当地“稻鸭同作”个农田里发现伊个踪迹，马上大力培养，才有了阿拉看到个凤头白鸭。

绿波廊临水茶肆勿但做个糕点精美，而且接待过交关名人，楼梯墙壁浪挂仔勿少照片。阿拉点了蟹粉小笼、椒盐葫芦酥、腊味花菇包等六样小吃。小笼包做得皮薄透亮，褶子整整齐齐；花菇包做得像一只只大香菇，无论颜色还是外观侪看勿出是面粉做嗰；老店家个真生活让吃客看得眉花眼笑，吃得胃口大开。

豫园边浪有条“光启路”，让阿拉想起历史人物徐光启，徐家汇还有光启公园。打开手机百度一查，才晓得明朝科学家徐光启出生地就是今朝个南市老城厢光启路附近。后来，徐光启就葬辣当时肇嘉浜与法华泾两水会合处，徐氏后裔也辣此地繁衍生息，逐渐形成村落，徐家汇也由此得名。

搿趟上海本地游收获勿小，家乡地美物美人情美。想好了，下一趟就去徐家汇白相，老同学一道健身又开心！