炒一碗豌豆翠衣

文/杨保飞

最近一抢，菜场里独多两种豆，一种就是蚕豆，一种就是豌豆。价钿也侪蛮便宜，邪气受欢迎。上点年纪个上海人拿蚕豆叫做“大候豆”，拿豌豆叫做“小候豆”。

姆妈从小告诉阿拉：蚕豆是热性个物事，勿好多吃；豌豆健脾祛湿，吃仔好嗰。勿过，对我来讲，搿个两种豆我侪老欢喜吃嗰，从伊拉上市开始，一直吃到伊拉落市。

平常剥下来个豌豆壳，一般侪是厾脱嗰。下面我来介绍一种“变废为宝”个窍门，让豌豆壳变成好吃个物事。侬或许也可以试试看。

一秸豌豆，一剥两爿生，豆子剥出来，拿起一爿豆壳，朝里对折，豆壳就会变成硬骨搭仔翠衣两层，弃硬骨、取翠衣，就搿能一爿一爿弄，就能得到浅浅一碗豌豆翠衣。汏清爽，沥干，起一只小油镬，拿豌豆翠衣放下去翻炒，放点盐、放点糖，一变色就可以盛出来了。

看起来碧绿生青，就像翡翠一样。吃到嘴巴里，甜咪咪、脆生生、鲜笃笃、滑叽叽，好吃得勿得了！老早子阿拉最欢喜用伊过老酒吃，味道邪气好。