壮哉壮哉赢一场就保级

娄一晨

本周三，晚饭时分，一友人来电，言辞恳切。

友人：娄啊，天津泰达真个就保级成功了？就赢了一场球？

我：是呀，规则就是迭能定个呀。两回合比赛天津泰达1胜1平深圳，进入第9-第12名区域，深圳进入第13-第16名区域。所以天津泰达提前保级成功了。

友人突然大骂：真个有迭种事体啊？天津第一阶段一场也勿赢居然还能保级，对面人家深圳实在是冤枉煞了，迭个也好叫中超联赛啊？足协连得迭能介个赛程赛制也想得出来……

我只能劝他：哎哎哎，老兄啊，先消消气，覅介激动呀……规则就是规则，当时赛程赛制确定下来个辰光大家侪接受个呀。哦，现在极端情况发生了，觉着深圳吃亏了，大家又开始勿满意啦？难道临时三刻再来改规则？

友人长叹一声：唉，我倒勿是要为深圳喊冤枉，实在是觉着足协当初制定赛程赛制真个是乌搞百叶结！娄啊，侬讲讲看，足协迭帮人难道就算勿清爽现在迭只赛程赛制当中个漏洞吗？阿拉大家侪看出来了呀？

我：对啊，侬老兄讲了呒没错，大家侪看到了。甚至于我两个广东台个兄弟还帮我讲过最最极端个状况，侬晓得伐？伊拉算过，最最极端会得出现啥？比如像广州富力，第一阶段14轮全输，一只球也勿进，倒数第一进入保级组。接下来保级组里厢两回合也是勿进球，最后靠罚点球淘汰对方提前保级！结棍伐？有腔调伐？

友人大惊：啊？整个赛季一场球也勿赢？一只球也勿进？罚点球保级？

我：所以呀，迭个就是特殊赛制所造成个呀。但是，闲话讲转来，既然赛制已经确定了，大家也已经接受了，现在再来讨论一个看上去非常勿公平个结果还有啥意思伐啦？

友人好一会才又开口：各么，足协当时辰光就想勿出更加好一眼个赛程赛制了？

我笑了：呵呵，当然可以。比如学习人家苏格兰联赛，就是苏超。人家是12支球队，先打三循环，就是33轮。先按照33轮联赛个积分排名分出上下半区，前六名进上半区，后六名进下半区。再打一只单循环，五轮。最后根据总个积分排出名次。

友人：嗯，阿拉勿需要打三循环，两循环就可以了，然后再分上下半区再打一只单循环，勿是就蛮好？

我：但是今年情况特殊呀。上半年已经浪费忒了，只剩下半年了。辰光又紧张，又勿好打主客场制，又勿好捺介许多球队侪安排了一只赛区，又勿好捺赛季拉长拖到明年去结束。还有的足协杯帮亚冠联赛来。侬叫足协哪能来安排？啊是头晕了一塌糊涂伐啦？

友人：好了好了，算侬有道理，好伐？我还是觉着足协各帮子人勿动脑筋，勿弄出一眼笑话勿开心……

我大笑：朋友，大家转换一下立场，足协今年已经蛮勿容易来……勿管哪能，能够拿今年个联赛组织起来就是大功一件，对伐？至于讲到特殊年份里厢个特殊赛制，只能是今年迭能介处理，勿可能明年后年继续采用。否则就是真个笑话闹大来……

友人又是一声长叹：但愿如此……