卡纳瓦罗还回广州吗

娄一晨

本周一深夜，早就结束了亚冠征程的广州恒大队，终于回家了。

但是，已经被架空的主教练卡纳瓦罗却没有随队回到广州，而是直接回意大利去了。消息一出，自然又引发坊间热议。就在周二晚间，一友人来电，专门讨论此事。

友人：喂，娄兄啊，侬可以呃，上个礼拜侬写文章讲卡纳瓦罗勿可能回广州，结棍呃！果然拨侬讲对了……

我：哈哈哈，我也就是随便写写，实在是拨伊拉《东方体育日报》逼上梁山。呒没想到侬老兄看了介仔细？还要特为打电话来夸奖我，实在是勿敢当……

友人：我今朝就是想来问侬卡纳瓦罗迭记蛮辣手啊，自说自话就回意大利去了，格么接下去恒大会哪能办？就此结束了？上个礼拜额新闻里勿是还讲恒大老板通知卡纳瓦罗回广州面谈，态度非常坚决吗？

我：唉，现在啦，有交关新闻就是听过算数，3565（米扫拉扫）。态度坚决？迭额算啥啦？算合同条款吗？对卡纳瓦罗有约束力吗？讲句良心闲话，卡纳瓦罗算是蛮老实啊，还陪牢球队多蹲了一个礼拜。侬看到申花上港个外教了吗？人家一帮子是比赛一结束就跑脱了，啥人还有心向来管侬球员。

友人：是个呀，我就是看勿懂恒大老板帮卡纳瓦罗之间到底是勒嗨白相啥么事？按照侬娄兄上额礼拜个文章里厢写个内容，卡纳瓦罗完全呒没必要陪牢球队多蹲一个礼拜。但是，伊就是多蹲了。要么是双方讲好个条件？一道演拨大家看看？

我：哈哈哈，侬老兄火眼金睛，看问题一针见血！佩服！真个老有可能就是双方提前商量好个条件。侬想呀，我假使是卡纳瓦罗，接到老板通知要回广州，会得是啥反应？

友人：肯定翻毛腔！对吗？赛季也已经结束了，勿许我回意大利休假，还硬劲要我回广州？当我戆大处理啊？

我：哈哈哈，漂亮！是人侪会得迭能介想。所以我相信卡纳瓦罗根本就呒没考虑过回广州个可能性！先覅讲从卡塔尔飞意大利只有一半个路程，侬只要想想现在已经几日啦？离开圣诞节还剩几天啊？光是为了圣诞节，卡纳瓦罗就勿可能回广州！

友人：所以娄兄额意思就是俱乐部老板开了只软档：只要侬卡纳瓦罗陪牢球队多蹲两天，就算是我老板面子廊厢有交代了，侬要回意大利就随便吗？

我：实际上卡纳瓦罗最大额筹码是啥？还是我前头讲到个，“态度坚决”算合同条款吗？对卡纳瓦罗有约束力吗？也就是讲，侬俱乐部假使用力过猛、吃相太难看，迭额意大利人一定是拿牢工作合同来帮侬拼命——合同里厢有白纸黑字讲我主教练赛季结束后勿好回自家屋里休假吗？迭额官司假使要打到国际足联，事体就要闹大来，恐怕中国足协也要一道吃老蒜来……

友人：各么侬讲卡纳瓦罗还会回广州吗？

我大笑：哈哈哈，来呀！伊额工作合同还呒没结束来，要到2022年来……

友人也笑：还是侬文章里厢额最后一句咯：主教练，卡纳瓦罗，括号——已架空……