金牌榜？奖牌榜？

娄一晨

万众瞩目的北京冬奥会结束了，可是有关冬奥会的话题讨论还在延续。

前两天，我正好有事到一家朋友开的公司里去，结果就被拉进去讨论了好一会……

W：娄老师，正好侬来了，请教一下……

我一阵惶恐：哎哎哎，大家兄弟道理，覅讲请教，有闲话尽管讲，有事体尽管吩咐……

W：我正好勒嗨帮老S讨论迭趟冬奥会额奖牌榜，为啥美国人个媒体侪要按照奖牌总数来排名？网廊厢交关人侪讲美国人就是要为了排名排了阿拉中国队前头，所以一定要迭能介排。侬老法师觉着呢？

我：哈哈哈，我也看到网廊厢额观点了，只好讲交关网友呢理解过度了……

S：啊？理解过度？为啥？

我：我只好讲我印象当中美国人一直就是按照奖牌总数来排名次呃，奥运会啦、田径世界锦标赛啦、游泳世界锦标赛啦……反正我转播额迭眼有奖牌榜个比赛伊拉美国人个媒体侪是迭能弄额，勿管是电视台还是报纸……至于是勿是专门针对阿拉中国队，应该呒没吃了介饱？

S：我觉着伊拉就是存心额！金牌榜呀，勿按照金牌数量排名按照啥么事来排啦？

我：兄弟啊，是奖牌榜，奖牌榜……英文叫medal table……勿单单是金牌，否则还要发银牌铜牌做啥啦？侬讲呢？只好讲阿拉介许多年数以来已经习惯了以金牌数来排名次，所以大家也就习惯性额拿奖牌榜称为金牌榜来……

W：个么国际廊厢人家是哪能排法啦？为啥我看来看去只有美国人是按照奖牌总数来排哦啦？

我：据我晓得是两种排法侪有额。比如讲迭届冬奥会，侬到国际奥委会额官网廊去寻，就会得看到伊额奖牌榜也是以金牌数来排名次。但是，最后一栏还有按奖牌数排额名次，侬点进去看一眼阿拉中国队排第几名？

老S手脚飞快，迅速找到国际奥委会的官网，点了进去！

S：啊？真额有啊？居然连得日本队也排了阿拉前头？

我：好来好来，实际廊厢就是同一只榜，也呒没啥对错之分。无非是大家理解勿一样。

W：个么我还想再问侬呀。为啥只有美国人欢喜看奖牌总数啦？

我大笑：哈哈哈，美国人么，一直号称自家是新大陆呀……既然是新大陆，当然要显出自家较老大陆勿一样咯？

大家都笑……