输球也能出线？！

娄一晨

本周二夜里大概9点钟刚过，娄老师的手机突然欢唱起来。是老同学X。

X：老娄啊，我急煞了，中国队还有希望出线吗？

我马上就明白了：哈哈，侬老兄阿是刚刚看好中国队0比1输拨韩国队，是吗？

X：是呀，中国队一点机会也呒没！只好靠两只角球任意球碰碰运道！迭个哪能弄得过人家啦？孙兴慜踢了是好呀，随便带球随便过人，阿拉三个人居然还防勿牢伊一家头！

我：今朝还算好，韩国队还是蛮客气额，1比0大家侪有交待……现在就看泰国队好赢新加坡几只来……

X：泰国对新加坡开始了吗？现在几比几了啦？哦哟，我到处勒嗨寻网廊厢啥地方有得转播泰国对新加坡额比赛。

我：泰国队搿场夜到8点半开始额，现在上半场还呒没结束。

X：晓得了，我马上再去寻……

说话间，泰国队进球了……

一小时后，X又来电话。

X：新加坡可以额，世界波扳平比分！有腔调！

我笑了：哈哈哈，兄弟啊，快速反击进球本来就是一半对一半额概率，新加坡只好讲是正常发挥水平。

X突然连连惊呼：哎哟哟哟，要命啊！泰国队又进球了！吓人吓人……喂，老娄啊，我晚点再打拨侬……

又过了大约半小时……

X：喂，老娄啊，吓煞脱我了……哦哟，还好刚刚泰国队额13号最后一脚打偏脱噢……我差点人也立勿牢了呀……

我：乃么侬好放心来，中国队额骨头碰着天花板，输球照样出线……

X突然厉声：帮帮忙哦！搿能介出线阿拉球迷哪能吃得消啦？侬以为真额是好死不如赖活着？上个礼拜侬老娄直播中国VS泰国我也看额呀，勿是我瞎讲啥，当时辰光假使泰国队上半场把握机会再好一眼，打成2比0领先，下半场啥地方还追得回来啊？

我必须承认老同学说得在理……

X继续输出：老娄啊，侬我兄弟从1981年开始看中国队踢预选赛。当年3比0赢科威特，4比2翻盘赢沙特，对吗？伊额辰光阿拉只有几岁？介许多年数，“5·19”、黑色三分钟、黑色九分钟、大连金州、净胜球算勿清爽……阿拉啥么事呒没看到过？

我只能沉默，同时听清了老同学挂断电话前的最后一句话：输球还好出线，真额是塌台啊……