晒干蚕豆囥起来

文/侯宝良

每年谷雨前后，蚕豆会紧凑上市，时鲜货味道鲜嫩是好吃，但价钿也的确勿便宜。想等两天再吃嘛？偏偏吃蚕豆个辰光又短，勿过几个礼拜，豆壳就发黑、蔫脱，豆也老了烧勿大酥，只好剥脱仔豆皮烧汤，要么炒炒豆瓣酥咾啥。

老早阿拉下乡劳动摘过蚕豆，侪晓得到五月底蚕豆基本就摘光了，所以迭个辰光大量上市价钿最便宜，勿少人家侪拿仔麻袋、米袋去背。有趟仔我荡马路碰着菜场急于收摊，蚕豆价钿特别便宜，结果有交关人排队抢购。我也想买，身浪呒没带布袋，只好脱下长裤，扎紧裤脚管去装蚕豆。回到屋里样子蛮狼狈，邻居看到侪称赞：“‘小俘尸’脑子倒是活络嗰！”

蚕豆买得多，来勿及吃，当然要囥起来。一家人吃好夜饭就剥蚕豆，蚕豆摊仔满满一“团箕”（一种篾编器皿）。要是现在就再剥皮装进塑料袋放冰箱了。从前呒没冰箱，就要晒干以后，囥到小瓫或者木桶里密封。日后碰着呒啥菜好吃个辰光，拿点出来劈豆瓣烧菜。

“劈豆瓣”搿种生活，侪是阿拉“小八腊子”个事体。大人上班前关照好：“今朝覅出去白相，登辣屋里劈眼豆瓣，夜里烧菜吃”。要是一家头劈豆瓣是蛮厌气嗰，还好邻居阿三头是我好朋友，常常来帮我一道劈豆瓣。阿拉两家头一人一只小凳子，一人一把菜刀，刀口朝上摆辣小台子浪，左手拇指、食指拿粒干蚕豆竖起来放辣刀口浪，小手指挡牢刀面，右手拿根小木棍轻轻敲蚕豆，一敲两爿，一歇歇就敲了交关。

阿三比我会做家务，伊讲，还会做炒货店里买个“油氽豆瓣”，就是油里氽一氽。我讲现在油介紧张，哪能好随便开油锅呢？伊朝我眨眨眼：“炒菜前头稍微氽两粒吃吃，覅太赞哦！阿拉姆妈勿晓得嗰。”伊还教我做“发芽豆”：蚕豆先泡一天，滤干倒辣湿布浪，再用湿布盖好，接下来每天洒点水，慢慢交蚕豆就会发芽。“咸菜烧发芽豆覅忒鲜噢！”

晒干个蚕豆容易囥，又好随时拿出来就派用场，只要提前用水泡一歇，马上好烧了吃，像豆瓣炒蛋、豆瓣烧豆腐、豆瓣咸菜汤咾啥。现在食用油勿稀奇，弄眼“油氽豆瓣”既当零食又当菜，屋里人侪欢喜吃。眼看蚕豆又要落市了，现在家家侪有冰箱，存放更加便当，多买点囥起来是勿错个选择。