石头往山里背

◆ 钱红春

山里向出石头，“石头往山里背”搿句闲话，意思是做吃力勿讨好个戅事体。我参军后辣外地服役，每趟回上海探亲，总会买点紧俏个上海货带回来，老娘就会用搿句闲话笑我。退休以后，我搭老伴常常出门旅游，总会买点当地个土特产。特别是到了国外，买点国内看勿大见或者是价钿便宜个物事一眼勿稀奇。

有趟到日本旅游，看到一种可以折成公文包样子个购物袋。拆开后，袋底浪有两只轮盘，稍许一扳就可以拖了跑，轻巧方便。我一口气买了好几只，准备带回来送人。啥人晓得回到上海呒没多少辰光，搿种购物袋到处侪有卖，同我辣日本背回来个一式一样，价钿只有三分之一。原来搿种购物袋是中国设计制造出口到日本嗰，拨我漂洋过海背回来。记得到德国旅游辰光，海德堡是最后一站。因为一路匆忙，呒没买啥物事。当天夜里就要到法兰克福乘飞机回国，就兜兜逛逛，想买点啥。走进一家卖包袋个小店。老伴勿像年轻人追求名牌，随便挑了一只咖啡色牛皮包，可背可拎。回到停车场上车，坐好以后，老伴打开拎包仔细看。发现标牌浪有“made in china”个英文。回到屋里，儿子媳妇怕我搭老伴再“石头往山里背”，一再关照覅为伊拉买啥。有一天吃好夜饭，几个“驴友”约阿拉老夫妻到附近一家大商场。尽管一再关照自家“只看勿买”，最后还是为孙囡买了一双美国品牌个运动鞋。回到宾馆翻开鞋舌头背面一看，还是“中国制造”。

假使讲勒外国买着“中国制造”往往是“无心之失”，葛末有一趟勒苏格兰爱丁堡就是明知故犯。搿天游览结束，我搭老伴走进一家羊毛制品专卖店。当地为了接待中国游客，店里聘用了会讲中国话个营业员。辣挑选头巾个辰光，虽然讲价钿有高低，但表面浪看勿出啥区别。营业员看阿拉拿勿定主意，又看阿拉年纪大，难得出趟国，就瞄瞄四周，看呒没人，就轻轻交讲，价钿稍许便宜点个是从中国浙江义乌进口嗰。老伴一惊，想勿到一个羊毛制品世界闻名个国家，会从中国进口“当地特产”。老伴门槛比我精，反复挑选，最后还是选了几条中国产嗰。除脱价钿便宜，还因为工艺搭手感一眼勿比当地产个推板。

石头往山里背，看起来有点“戆”，其实更加多个是自豪。因为我见证了国家个发展搭进步；见证了国家个制造搭创新能力；也见证了中华民族个聪明才智搭奋发图强个精神。