“口是心非”个鹦哥

◆ 邵天骏

屋里养了一只鹦哥，是捡回来个，发现伊个当口，伊一眼也勿怕人。我猜搿只鹦哥可能是从人家屋里逃出来，或者是拨人家放生个。问了周围勿少人，侪讲勿是伊拉个。后来我决定带回去养，假使伊个主人寻过来了，就立刻还拨人家。搿只活泼可爱个鹦哥从此勒我屋里落户了。

鹦哥个聪明，尤其体现辣能够模仿人讲闲话。每次走到伊面前，就有可能听到伊自言自语。于是，我就会跟伊交流几句，一来二去，还真有点难舍难分个味道了。有一天，鹦哥看到我搿个“老朋友”来了，开始辣鸟笼里跳上跳下，一副精神抖擞个样子。只听伊勿停个叫：“勿好吃，勿好吃！”一边叫一边朝我看。

咦，啥个东西勿好吃？我想要看个究竟，走进一看，发现鸟笼里放了一块梨。难道鹦哥对搿种水果勿感兴趣？正辣疑惑当中，看到餐桌浪盆子里还有几只剩下来个梨。我拿起来尝了一口，又甜又脆，汁水丰富，味道蛮好。

看到我走过去，鹦哥马上低头，一口一小块，连吃几口，又抬头讲“勿好吃”。谜底揭开了！鹦哥嘴巴浪讲“勿好吃”，实际浪吃得斜气开心，真是“口是心非”。

其实鹦哥学人讲闲话开始只是模仿发音，具体语义是勿晓得个，需要勿断听、勿断观察、勿断模仿，才能逐渐掌握正确个意思。搭鹦哥讲闲话，总会听到各种各样真真假假个回答，常常让我忍俊不禁，又想好好探索一番。或许，搿就是我老欢喜“口是心非”个鹦哥、愿意搭伊交朋友，又愿意陪伊白相个原因。