没有体育比赛的日子

娄一晨

前两天，有友人来电慰问。

友人：娄兄迭两天哪能啦？放长假应该放得蛮开心伐？

我只好苦笑：朋友弗作兴额！嘲笑我一个无业游民……

友人哈哈哈：我正好是要问侬呀。前天礼拜二，欧足联宣布今年个欧锦赛推迟到明年去了，个么各个国家个联赛呢？还有机会踢下去伐？还有本赛季个欧冠，总要有个说法咯？

我：呵呵，侬老兄欢喜看球阿是难过煞了，是伐？

友人：是呀是呀……

我：欧锦赛推迟到明年应该是大家侪想到个结果，也是各方各面一道商量出来，最能够拨大家侪接受个结果。现在就等于是捺6月份、7月份全部空出来拨各个国家个联赛来使用了。我个分析是，本赛季个欧洲五大联赛肯定要全部打光。4月份能够恢复嘛就早点打光，否则就是再拖到6月份、7月份。欧冠欧联一样道理。

友人：拖到7月份？迭能介说话勿是要影响到下一个赛季啦？

我：当然有可能咯！侬想呀，现在个疫情已经横扫全世界，连得格陵兰迭种冰天雪地个角落也已经受到影响了。最要命个是疫情啥辰光能够结束侬讲得清爽伐啦？讲勿清爽呀！所以，最坏个结果就是，阿拉先弗考虑取消哦，本赛季联赛一路要打到7月底8月头，直接对接新赛季。

友人：假使真个变成迭种情况，球员勿是要昏过去啦？暑假呒没来？

我：迭个呒没办法呃呀，只好讲是人算不如天算。侬看五大联赛现在通知里厢写个侪是先停到4月初，对伐？但是伊拉心里厢也晓得5月份估计也难讲。所以，我觉着欧足联现在也是博一枪、拼一记，或者就是勿买账——哪能？到7月份还控制勿牢疫情？

友人笑：娄兄，侬讲了有点道理额……但是，我还要再问侬呀，各么奥运会呢？

我：奥运会就复杂来……国际奥委会最新个表态是“如期举办”，不会推迟更不会取消。但是万一欧美国家个情况到了7月份还呒没好转哪能办？运动员能勿能正常训练，是勿是状态良好阿拉另外再讲。最头大个是到辰光欧美国家选手拨关牢了，根本出勿来侬哪能办？奥运会改成亚运会？甚至于最最极端个状态，国际奥委会主席罗格也出勿来，也拨关牢了！迭个……

友人赶紧打断我：哎哎哎，侬只赤佬，简直就是一只乌鸦嘴嘛……