没有体育比赛的日子II

娄一晨

本周，体育世界最大的新闻：国际奥委会正式宣布2020年东京奥运会推迟到明年举行。

那天晚上这条新闻刚刷屏，我的电话就响了。

友人：娄兄啊，侬真个是乌鸦嘴了结棍啊……

我大惊：啊？啥情况？侬讲啥么事啊？

友人冷笑：哼哼，侬介快就忘记忒了？上个礼拜，侬娄兄讲啥“奥运会要改成亚运会”，啥“奥委会主席巴赫有可能拨关了屋里厢出勿来”……捺么好来，人家国际奥委会真额宣布奥运会推迟来……

我只好苦笑：喂，阿哥啊，迭个还好怪了我头廊厢啊？我上个礼拜只是帮侬分析分析有可能出现个最极端个状况。对伐？侬想想看，新冠病毒横扫全世界，对各个国家额运动员来讲，现在每天只好蹲了自家屋里厢隔离，侬叫伊哪能训练？哪能备战？关键是呒没人晓得自家要隔离多少辰光！一个号头？两个号头？三个号头？

友人：我晓得呃，我晓得呃。昨日新闻里厢加拿大奥委会第一个宣布退出，寻额理由就是现在根本呒没办法组建国家队，根本呒没办法保证运动员训练。但是，我想晓得额是国家奥委会也好，日本人也好，一路坚持勿肯松口介长辰光，上个礼拜还一口咬牢“如期举行”，为啥到最后讲推迟就推迟了呢？

我：唉，实在是摒勿牢了呀！日本人大家侪好理解，东道主前期准备已经投进去个人力、物力、钞票，随便哪能勿肯推迟呃呀……

友人称善：迭个倒是呃，随便啥人侪勿会答应。

我继续说：国际奥委会呢可能完全呒没想到现在额情况介吓人。我相信上额礼拜伊拉出来讲“如期举行”个辰光肯定还是想拼一记呃。难道四个号头还搞勿定迭只病毒？但是，问题在于交关国家额想法是完全勿一样呃。所以加拿大第一个跳出来，澳大利亚马上跟进，接下来就收啊收勿牢来……

友人：乃么有劲来，明年，2021年变成体育大年来！奥运会、欧洲杯、美洲杯，轧闹猛轧了开心啊……

我笑了：是呃呀，整个体育世界全部乱套！本来单数年侪是各个单项锦标赛，像田径世锦赛、游泳世锦赛，每两年一趟。乃么奥运会摆到明年开，直接就影响到迭些额单项世锦赛，我估计老有可能明年要取消忒一批世界锦标赛。

友人：我看新闻里讲还有明年呃世俱杯，第一趟蹲了中国办呃，可能也要推迟。

我叹了一口气：是呀，一记头变成明年辰光勿够用来……