聚会聊足球

娄一晨

“五一”长假，和几个老兄弟一起聚会。都是老同学，小时候一起玩耍长大的。几个大男人凑到一起，聊着聊着就又聊到了中国足球。

甲：阿娄，前两天中国国家队最新名单出来了，我正好想请教侬来。

我惶恐：哎哎哎，侬勿要吓我好伐？请教？请教啥么事？阿拉老兄弟，呒没啥请教勿请教啊！

乙：哈哈哈，阿娄，侬是专家呀，阿拉勿请教侬请教啥人？

我：两位阿哥啊，好交好交，中国足球唉，有得专家啊？覅讲中国人来，里皮，意大利人，算得专家了伐？跑到中国来兜一圈，勿是照样灰溜溜溜回去啦？

丙：哈哈哈，阿娄就是促刻！哎，甲，侬好问了，到底想请教啥么事啦？

甲：我就是想问迭支新国家队里厢有一个新名字，洛国富是啥人？

我大笑：哈哈哈，甲兄，侬应该是长远勿关心中国足球了伐？洛国富呀，上海球员呀！一家门兄弟交关，从陆角陆角壹开始，一直排到陆角捌陆角玖……

甲乙丙三人稍楞，随即恍然：侬瞎七八搭，好交讲！

我又笑：好好好，我好交讲。迭个洛国富嘛也是巴西人，也是归化球员呀！去年广州恒大一口气归化了好几个，还记得伐？其中之一就是迭个朋友，巴西名字叫阿洛伊西奥，最早蹲了山东鲁能踢球，还做个中超最佳射手呃。想起来了伐？

甲点头：对啊对啊，我记得去年网廊厢看到过伊拉几个巴西人个入籍证明呃，是复印件。当时好像反响蛮大个，对伐？

我：呒没错。当时辰光就有几个朋友来问我迭个事体，也是一道吃饭个辰光。伊拉几个人问了还要促刻来，“今后阿是中国队里厢侪是外国面孔啦？”“今后侬娄兄解说个辰光阿是要介绍今朝出场个是中国巴西队啦？”

乙：各么侬当时辰光是哪能回答伊拉啊啦？

我：我只好讲我勿晓得，因为迭只口子一旦开开来了，想收就收勿牢了！但是，到底做到哪能介程度，要看中国人额心理承受能力。到底能接受多少归化球员，归化多少辰光。

甲又问：照侬迭个讲法，中国足球就要一直归化下去了咯？

我苦笑：哪能办啦？中国人要面子呀……世界杯出线侬总要个咯？2018年世界杯还记得伐啦？人家日本队已经可以冲击比利时迭种欧洲强队来，再下去真额要进世界杯四强来！阿拉呢？连得亚洲也出勿去，坍台伐啦？所以，立了中国足协个角度廊厢，假使归化球员取得效果了，说明啥？说明足协额政策漂亮！到位！一针见血！到辰光一定有人会得出来发声音——看到伐？老早就应该归化来……

三人一起问：假使呒没效果呢？

我：假使呒没效果？只能说明中国足球真个呒没药好救了！对伐？我足协已经动足之脑筋了噢，能够想个办法侪想过了，对伐？只能说明阿拉归化外国人个力度还勿够！

三人大惊失色：阿娄，侬呒没疯忒伐？照侬迭能讲法，今后中国小朋友就用勿着踢足球了咯？

我：哈哈哈，当然咯！有得陆角陆角壹嘞嗨，一直到陆角捌陆角玖，再加一个洛国富，阿是11个人侪到齐了啦？