裁判有仇吗

娄一晨

短短一周的时间，中超联赛中的裁判问题火爆异常。前两天，又有一位友人打来电话，专门和我聊起这个话题。

友人：喂，娄兄啊，侬最近做个聊天节目《更上一层楼》可以呃，就是聊裁判额一集。我看了笑煞忒了。

我赶紧道谢：谢谢兄弟谢谢兄弟，我也就是随口瞎讲八讲，希望大家看到听到能够一道开心开心。讲了勿到位额地方还要请侬老兄多多包涵。

友人：哦哟，娄兄侬客气得来……我是想问侬呀，前天老山东额比赛，费莱尼最后辰光只头球勿是顶了老漂亮额吗？裁判脑子坏啊？莫名其妙吹伊犯规，进球勿算。啥体啦？裁判看到伊有仇啊？要么就是看到老山东整支球队有仇……

我笑：哈哈哈，侬老兄阿是看到有交关人讲山东球迷得罪了整个裁判圈子，所以裁判们全部团结起来了，是伐？

友人也笑：是额呀是额呀。网廊厢有交关文章侪是迭能讲额呀，侪是阴谋论，勿得了额阴谋论。所以我就想问侬呀，到底迭场比赛裁判是带牢子情绪伐啦？

我：唉，迭场比赛老山东进了两只点球来，裁判假使真额带情绪额闲话，做啥还要判两只点球拨伊拉啦？侬晓得额，我是一直勿相信阴谋论额，所以我只好讲费莱尼迭只头球多数是裁判当时个视角问题，呒没看清爽而已。

友人：OKOK，算侬讲了有道理。个么再前头一场，老山东打北京，伊额韩国裁判呢？我老同意侬节目里讲额，裁判自家呒没主见啊？墙头草？拨两个VAR裁判蹲了耳机里厢一叫就呒没方向了？

我：是个呀！迭额是我最接受勿了额……明明迭额韩国人自家第一反应是勿犯规，允许比赛继续进行，直到进球。结果VAR一叫，迭额朋友直接180度转弯。所以我勿是讲嘛，接下来球迷查论文要查到韩国去来……

友人：哎，对额呀，现在球迷额本事大得勿得了，查裁判额论文，查裁判额个人信息，打骚扰电话，上门拉横幅……

我一声叹息：唉，所以我勿是一直帮侬讲吗？裁判现在是高危职业，高风险职业，分分钟可能两头勿讨好，弄得双方球队球迷一道骂伊，最后连得中国足协也保勿牢伊……

友人：关键是现在有的VAR参与进来还是出现了介许多争议判罚，迭眼裁判到底搞得定勿啦？下趟还有啥人会得相信伊拉？更加要阴谋论来……

我：迭额只有靠裁判自家想办法解决来，旁观者又帮勿上忙，对吗？当然勿仅仅是裁判，更加重要额是国际足联对规则需要制定解释得更加仔细更加具体更加严密，尽量减少不同裁判对于同一条规则产生勿一样额理解。因为啥，现在大家最头晕额就是每一个裁判对规则额理解以及判罚额标准、尺度侪勿一样，迭额是最讨厌额……

友人：个么侬娄兄觉着国际足联有可能来改进吗？

我只好苦笑：呵呵，我哪能晓得啦？我又勿是国际足联主席咯……所以现在只好由裁判来承担所有责任，包括拨大家骂到狗血淋头。当然，我相信阿拉国内介许多裁判老早就习惯了。还记得阿拉小辰光看足球，上海人是哪能骂裁判吗？裁判××。