美伊大战没阴谋论

娄一晨

本周二晚上，娄老师正在房间里认真准备转播资料，友人急急来电问询。

友人：喂，老娄啊，今朝半夜里厢美国VS伊朗是侬转播吗？

我：哎呀，迭场球倒是呒没安排我呀。我等脱一歇要转播厄瓜多尔VS塞内加尔，也是一场生死大战。哪能了啦？

友人：哦，是迭能呃，我正好帮几个朋友一道吃饭，讲起迭场美伊大战。伊拉几个人侪讲迭场比赛哪能哪能刺刀见红，还有得俄罗斯裁判，美国队肯定要吃老蒜了。所以我就想问问看侬有啥看法呀……

我略有诧异：啥地方来额俄罗斯裁判？老兄啊，小道消息侬也相信？本届世界杯，俄罗斯拨国际足联制裁，国家队取消预选赛资格，裁判也是一样拨轰出去了呀……所有执法本届世界杯比赛额裁判名单，国际足联官方网站廊厢侪查得到额呀！执法迭场美国VS伊朗比赛个主裁判是西班牙人安东尼奥·马特奥·拉奥斯，两个巡边员也是西班牙人。

友人：啊？格么伊朗队还踢啥么事啦？总归走脱来……

我：喂，阿哥啊，侬就想看到伊朗队能够小组出线？要么就是几个人觉着只要是美国队出来踢比赛背后头一定有啥阴谋诡计？

友人一时语塞……

我：兄弟啊，按照我额经验，体育比赛绝大多数辰光就是体育比赛，呒没介许多阴谋诡计混勒里厢。侬讲到美国队，人家踢了又勿差，勿是一点实力也呒没，0比0踢平英格兰足够证明了。

友人：格么从国际政治廊厢来讲美国伊朗是死对头，美国人勿是一直制裁伊朗额嘛？体育赛场廊厢就介客气啦？

我：唉，老兄啊，国际政治当中额死对头多来……世界杯分组呒没讲过勿好让美国伊朗分了一道。而且美国伊朗1998年世界杯就蹲了一个小组，当时辰光还是伊朗2比1赢额，侬听说过美国人当时有啥勿开心要去报复人家？

友人沉吟片刻：嗯，格么侬觉着迭场比赛呒没啥阴谋咯？

我：朋友啊，啥地方有得介许多阴谋诡计啦？我勿是一直讲美国队从来就是世界杯参赛球队里厢心态最放松个一支。为啥？因为随便伊拉踢成啥样子，美国国内老百姓就没几个人关心，而且现在迭额辰光，美国国内额体育比赛许许多多，职业篮球大学篮球职业橄榄球大学橄榄球，美国观众忙勿过来……

友人：OKOK，算侬讲勒有道理……