唏嘘？就不必了吧

娄一晨

年末岁尾的12月27日下午，中超赛场，广州队1比4惨败给长春亚泰，正式宣告提前一轮降级到明年的中甲联赛。

当天晚上，有朋友就来电和我聊起此事。

友人：喂，娄啊，今朝下半天中超联赛侬看了吗？广州恒大降级了侬晓得了吗？

我：阿哥啊，侬居然还关心广州恒大降级个事体？阿是最近没事体做啊？哈哈哈……

友人正色道：喂，侬好好交！人家广州恒大勿管哪能总还是拿过两个亚冠冠军，也算是为中国足球立过功呃。混到今朝降级，还是蛮作孽额！

我：作孽？就只好讲是自作孽不可活了……职业足球本来就是一门生意，做勒好赚钞票出成绩长盛不衰，做勒勿好流离失所关门歇业，迭额么就是客观规律呀！难道就因为伊当初是亚冠冠军就可以勿降级了？迭额又勿是“免死金牌”咯？

友人：我勿是讲伊广州恒大勿好降级，我只是想晓得为啥呒没人肯出来救伊一把？

我：坑挖了介大，埋了介深，哪能救法啦？当初大家侪看到侬广州恒大财大气粗，一掷千金，钞票勿当钞票往里厢掼，为点啥呢？冠军？为中国足球培养人才？客观廊厢可能有一眼作用，但是实际廊厢，多少只冠军只是一种表象而已。

友人：嗯，迭额倒是额……

我继续：乃么现在好来，拨到额好处越来越勿能刺激自家额主营业务发展，比如讲恒大额房地产，比如讲恒大吃辛吃苦想发展额新能源汽车。到最后发觉自家再白相下去要拨足球拖煞脱了，哪能办？阿是只好先拿足球掼脱了啦？

友人：是额呀！今年年初我看到新闻里讲广州恒大俱乐部宣布今年整支俱乐部所有队伍额年薪总额只有1500万额辰光，还包括恒大女足，我就晓得伊拉肯定要走脱了！原来是啥？原来是每年15亿还勿止吧？从15亿一记头自由落体落到1500万，还搞啥啦？

我：所以呀！我勿是老早就讲过，阿拉中国足球，勿管是国家队层面还是俱乐部联赛层面，最应该学习借鉴额是人家日本足球额发展过程。对吗？大家侪是差勿多同时开始走职业联赛额道路，为啥走到现在快30年了人家日本联赛一步步成熟起来，三级职业联赛已经有60家俱乐部来！侬讲讲看，阿是要让中国足球妒忌？