俄罗斯能参加亚运会吗

娄一晨

上周末，正好约了几个朋友一起吃饭，顺带着聊起了一个有趣的话题。

A：哎，娄兄啊，这两天我看到新闻里厢讲俄罗斯要来参加今年额亚运会啦？就是阿拉杭州马上要办额亚运会？

B：是呀，我也看到了呀，啥情况啦？

我：啥情况么大家懂呃呀！俄罗斯么现在到处受到制裁，运动员也一道拨制裁。要出来参加比赛只好以个人名义，勿好用国家名义。喏，迭两额礼拜澳洲网球公开赛看到吗？电视转播额字幕标板连得俄罗斯国旗也勿好显示出来，全部是一块白板……所以人家俄罗斯么要动脑筋额呀？明年又要奥运会了呀！我介许多运动员总要寻地方练兵？

C：哦，怪勿得！用今年额亚运会来为明年额奥运会练兵！迭额倒是机会正好，反正奥运会项目绝大多数也是亚运会项目。

B：格么参加亚运会倒没人来制裁俄罗斯了？美国人勿出来发两句声音？

我：喂，阿哥啊，亚运会跟美国又勿搭界，要伊出来发啥声音啦？侬没看到新闻里讲现在是亚奥理事会，就是每届亚运会额主办单位，出面邀请俄罗斯、白俄罗斯派运动员来参加亚运会。侬美国又勿是亚奥理事会额成员，有啥资格来反对？

A：娄兄讲了对呃，勿管是邀请还是制裁，只有赛事主办方有资格来发起，也只有成员单位有资格来同意或者反对。

我：没错！

B：格么俄罗斯来参加亚运会，中国队金牌会得少交关。

我：影响么肯定有点呃……俄罗斯假使真额派运动员全面参赛么，我现在能够想得到额是体操、艺术体操、花样游泳……嗯，迭额几只项目抢阿拉额金牌会得蛮结棍呃！接下来么，射击、举重、摔跤几只项目还要抢脱阿拉一点金牌……

A：还有球类项目来……

我：是呀！俄罗斯三大球好来抢金牌呃……小球里厢么，网球就勿讲了……手球、水球人家也强呃……

B：游泳、田径侬哪能勿讲？

我：游泳、田径金牌太多，俄罗斯好来抢抢，但是也做勿到大面积抢……

C：格么今年亚运会一记头变得好看起来了咯？前头几届实在是没看头，阿拉中国队金牌多是多得来大家已经没感觉了……

我：哈哈哈，是呀，希望如此……