中超还踢吗II

娄一晨

本周一，老兄弟W打来电话“问罪”。

W：娄先森，侬迭额人老勿好啊！侬哪能捺阿拉上礼拜蹲了办公室里聊天额内容写到文章里厢去了啦？

我只好“赔罪”：哈哈哈，勿好意思勿好意思，我只是觉着阿拉聊额内容蛮有劲呃，正好中超联赛能勿能踢起来也是交关人关心额话题，所以就写了一篇。

W：好来好来，我正好再问侬一只问题，也是阿拉办公室里小朋友想晓得呃。就是到现在今年额中超联赛赛程哪能还没出来？联赛没赛程还踢只啥魂灵头啦？

我大笑：哈哈哈，兄弟侬结棍！问问题一枪头问到总筋廊厢！但是，闲话要讲转来，侬我兄弟一直觉着赛程迭额生活是总筋，人家足协并勿是搿能介想呃！人家从来就认为赛程问题是最小额问题，最勿急额问题！足协里厢其他所有事体侪更加重要，要侬搿眼外头人瞎起劲点啥？

W：啊？迭额也可以啊？我是球队老板教练球员，急啊急煞来。联赛就要开始了，对手是啥人也勿晓得，我哪能准备啦？瞎准备啊？

我：所以讲阿拉额联赛勿职业、勿成熟、勿规范呀……我老早勿是帮倷侪讲过额么，人家英超联赛每年5月份赛季结束，等到6月下旬必然公布新赛季额赛程。迭额是啥？迭额就是规范、成熟、职业！所有20支英超球队侪可以提早了解8月新赛季开始以后额对手分布情况，了解每一个号头里厢自家额赛程到底是轻松还是恶劣。甚至于球队后勤可以根据赛程提早做好客场比赛额旅行方案，酒店差旅费用侪是成本呀。英国叫作地方小，侬想想看美国，NBA球队每年41场客场比赛，其中还有交关客场是连了一道呃，赛程勿出来我哪能弄啦？

W：唉，我就记得每年额中超联赛好像侪是搿副吞头势，每趟赛程侪要拖到最后几天再敲定。我是也看见足协买账，真额一点点也勿急……

我：兄弟啊，迭额就叫皇帝勿急急太监……覅讲赛程来，侬想想看，每年中超联赛额秩序册啥辰光出来呃？有得啊里一年是第一轮开始之前发到阿拉手里厢呃？三轮之后能够发下来已经算效率老老高来……侬还记得三十年前，阿拉当时一道蹲了有线体育刚刚开始转英超额辰光，人家英国人就寄过来一本英格兰足球年鉴，yearbook，厚得来像本字典一样，里厢勿仅仅是英超球队额内容，所有英格兰职业球队额基本资料侪包括了！

W：唉，真额哦，娄先森，往事不堪回首，说多了都是泪……