国际足联的捞钱新主张

娄一晨

前两天外出参加活动，巧遇一友人，莫名聊起了国际足联新版世俱杯方案的话题。

友人：娄啊，我正好想问侬呀。国际足联前两天刚刚宣布2025年新版世俱杯摆到美国去举办啦？本来勿是讲蹲勒阿拉中国来举办嘛？

我：是呀，本来国际足联是计划从2021年开始掿世俱杯扩军到24支球队，摆勒阿拉国内来举行。但是，迭两年勿是碰着疫情嘛，再加上国际足联动勿动就要出眼新花头，一记头又跳过24支队额方案，直接增加到32支队。侬讲讲看，侬假使是举办方，原来侬准备额方案只是对付24支球队，现在一枪头多出来8支球队，阿是要头晕到一塌糊涂？

友人：嗯，迭额倒是呃……而且我还看到新闻里讲国际足联吃心重勒勿得了，要求新版世俱杯额收入勿得低于40亿美金，其中东道主国家必须承担40%。也就是讲假使真额是阿拉中国人来举办额说话，先要交拨伊16亿美金？迭额有点过分了吗？简直像抢钞票一样……

我：哈哈哈，老兄啊，国际足联侬懂呃呀……介许多年数，国际足联一直只有靠世界杯赚钞票。所谓“三年勿开张，开张吃三年！”国际足联恨啊恨煞脱来……所以要拼命动脑筋掿世俱杯做大呀……

友人：迭额吃相太难看了？

我：吃相难看算啥啦？我之前做直播额辰光就讲过，国际足联最恨额是啥？最恨额就是欧足联，又好赚国家队比赛额钞票，比如四年一届额欧洲杯，对吗？又好赚俱乐部比赛额钞票，比如欧冠、欧联。而且俱乐部比赛是每年侪有呃！国际足联之前动过额脑筋多来，啥额世界杯每两年一届、每三年一届，推勿下去！现在算是想清爽了，开始要抓牢俱乐部赛事迭块蛋糕来……

友人：各么我就想晓得呀，阿拉做勿出16亿美金，美国人就做得出来嘛？

我：老兄啊，美国人呢是真额欢喜到现场去看体育比赛，勿管是啥项目侪有交关人会得去轧闹猛。每年7、8月份蹲勒美国举办额ICC，就是国际冠军杯，商业比赛。欧洲额豪门球队过去打比赛，皇马曼联唠啥，现场观众随便弄弄就是六七万人！八万人、九万人额比赛有过好几场。甚至于我记得好像有三场比赛现场观众超过十万人！侬讲讲看，迭额有点吓人吗？

友人：国际足联只算盘真额是精啊……