贝克汉姆收购曼联？

娄一晨

本周二，就有这样一位友人兴高采烈地来电问询。

友人：喂，娄啊，恭喜侬啊恭喜侬，贝克汉姆要收购曼联俱乐部了嘛？乃么侬好用勿着担心来，好日脚终于要来啦……

我：侬老兄也看到搿条新闻啦？先代表我魔谢谢侬关心。但是，我是一点点也勿敢开心。为啥？三个字——太复杂……四个字——没介便当……

友人：啊？侬娄兄迭额反应我倒是呒没想到！我看到搿条新闻额第一反应就是：嗯，贝克汉姆绝对是一个最合适额人选，所有曼联球迷应该侪能够接受，侪会得支持。我相信以小贝额实力，小贝额号召力，迭桩事体应该难度勿会的老大呃……

我：老兄啊，侬讲了有道理呃。但是事体真额呒没介便当！阿拉以切尔西为参考。新老板博利——美国老板，华尔街巨头，同时拥有洛杉矶湖人队57%额股份，洛杉矶道奇队20%额股份。算的是大老板了，但是伊收购切尔西额辰光还是要先拉一只群，就是先成立一个财团，一枪头掼出42亿英镑从阿布手里接盘。接下来还要再掼钞票出来，买球员、改造球场唠啥……前期成本投入勿得了啊……

友人：结棍啊……

我：是呀……所以侬想想看，小贝假使决心要冲进来收购曼联，更加需要拉一只实力超过博利额群，至少勿好比伊差。但是，切尔西已经价钿涨到42亿英镑了，个么我魔曼联额价钿要喊到多少？格雷泽家族额吃心多少吓人？卡塔尔财团报价60亿-70亿伊拉还勿肯接受，难道真额是要传说中额100亿？迭额生活侬觉着小贝介简单就能够吃得下来？

友人：现在英超俱乐部价钿侪弄得介吓人做啥啦？当初苏宁张老板2.7亿欧元收购国际米兰我已经觉着差勿多到顶来……

我：哈哈哈，朋友啊，世道勿一样来……为啥英超最近几年以来能够吸引介许多美国老板、阿拉伯老板？因为每个赛季结束每支降级球队侪有得1亿英镑额分成进账，个么每家俱乐部额价值要翻上去几只跟头？

友人：对额呀，所以小贝只要多寻几个美国老板或者阿拉伯老板拉群勿就好啦？

我：闲话是呒没错。但是，人家大老板首先要check侬整个额商业计划有勿有盈利额可能性。几年以后能够盈利？老板们是勿是有足够额耐心？问题是大投入一定会得带来大额收益吗？啥人也呒没办法保证，阿是啊？