责任尽在国际足联

娄一晨

那天都已经半夜了，还是有友人拖着我热烈讨论。在电话里。讨论中国队……

友人：喂，老娄啊，侬讲讲看，阿是亚足联成心要欺负阿拉？算啥名堂？朱辰杰介漂亮额头球进球硬劲拨吹出来！摆明了就是亚足联要报复阿拉放弃主办权咯？

我：哎，老兄啊，侬先覅介激动呀……为了一场比赛就更加呒没必要来……我还是迭句闲话，足球场廊呒没介许多阴谋论！刚刚中国队迭场也是一样……

友人惊诧：啊？侬老娄个意思是呒没阴谋？帮亚足联勿搭界？

我：我觉着呢，死抠规则额闲话，朱辰杰头球攻门额同时，蒋光太的确是越位！但是，侬问我蒋光太当时是勿是正好立了朱辰杰个头球线路廊厢？是勿是正好对对方最后一个后卫形成干扰？我只好讲我勿晓得……主裁判也勿晓得，所以伊第一反应是判进球有效！按照我介许多年转播过额介许多比赛来讲，迭种情况90%会得判进球有效……

友人又问：个么就是VAR裁判觉着蒋光太当时越位干扰咯？

我：唉，迭个啦就是足球比赛判罚当中最烦额地方！规则条文侪是一样额，但是每一个裁判理解出来个意思完全勿一样！以我来讲，我觉着视频慢镜头看出来蒋光太跟进球线路浑身勿搭界，勿存在干扰！但是，其他人看出来觉着蒋光太干扰影响到了对方最后一个后卫去救球额可能性！迭个侬讲得清爽啊？迭个生活太难弄来！

友人：个么就呒没办法好解决啦咯？

我只好摇头：难啊……国际足联为了鼓励进攻增加进球数，开始鼓励边裁有选择地举旗。所以大家就看到越位球员远离球运行个线路，或者勿参与进攻，边裁就勿举旗。最典型个例子么就是1994年美国世界杯，巴西VS荷兰，下半场罗马里奥慢悠悠往回头跑，勿碰球勿参与进攻。荷兰队后卫当时侪举手提醒裁判，裁判勿响。结果贝贝托后插上掿球，变成单刀进球！

友人：噢，对啊对啊，进好球以后，贝贝托还跑到边线庆祝，摇篮动作。

我：是呀，多少经典个场面！但是，迭只进球拨我讲起来就是一根烧了30年个导火线，烧得来搿点裁判，尤其是边裁，对越位规则个理解，对判罚标准个理解，对判罚时机个掌握一片混乱！一片灾难！

友人叹气：好吧，原来责任尽在国际足联……