赢球是硬道理

娄一晨

本周一，约了几个老同学开车出游。一路上走马观花、谈天说地，不亦乐乎……说着说着，又聊起了中泰生死大战。

X：老娄啊，礼拜四夜里厢中国队对泰国队额比赛侬要直播？（我点头。）

Y马上加入进来：是呀是呀，中国队有希望吗？我看交关媒体侪讲中国队必须要赢下来再能够小组出线。输脱额闲话就直接走脱，连得打平也有可能最后走脱……听上去好像又是老花头咯？

我只好叹一口气：唉，所以讲是生死大战呀……下个礼拜二客场踢韩国阿是凶多吉少啦？人家泰国队下个礼拜二回到主场踢新加坡，赢球基本廊是稳额。

一直沉默不语的S终于发话：老娄啊，中国队对泰国阿是武磊停赛啊？迭额生活哪能弄吗？

我又叹了一口气：是呀……倷晓得吗？中国队搿趟小组赛踢到现在，一共进了八只球，其中有五只是武磊进额！包括去年11月份客场赢泰国额一只进球。我之前就帮刘越，就是我额搭档，一道盘过迭额情况来。现在只好看中国队其他几个前锋，韦世豪啦，还有归化球员阿兰啦、费南多啦，看看迭点朋友能不能进球……

X：啊？啥情况？阿拉国内现在只有武磊一介头会得进球啦？好像今年联赛里厢也是只有武磊会得进球。

我：呵呵，呒想到侬老兄还关心今年额联赛啊？我只好搿能介讲，武磊蹲了自家俱乐部里厢呢比较幸福，身边有像奥斯卡迭能介额世界级球星帮忙创造机会、输送炮弹，机会多嘛射门就多，射门多嘛进球额概率也就高呀……海港队前头有两场联赛额射门次数已经超过40次来，赛过一场冰球比赛。国家队啥辰光能创造出介许多射门次数？

Y：噢，迭能介讲起来，武磊蹲了小组赛里能够进五只球还是可以额……

我：所以啦，对比俱乐部和国家队，武磊得到额机会上下落差太大来……但是闲话讲转来，调成其他几个前锋，碰着额问题实际廊是一样额……关键就在于国家队能够创造出多少额机会，侬连得机会也呒没，个么就侪是窝兮空……

S最后又将了我一军：老娄啊，个么侬觉着中国队搿场比赛有希望赢吗？

我只好苦笑：哎哎哎，三位阿哥，阿拉今朝出来是游山玩水、放松心情额，倷捺我逼死脱有意思吗？我假使预测中国队主场拨泰国逼平，下个礼拜二客场再逼平韩国绝处逢生！倷几个人相信？

三位老友异口同声地骂：侬只臭嘴巴……