亚冠乎？ 西丙乎？

娄一晨

周三半夜，笔者结束了亚冠赛事的直播，疲惫地驱车回家。

还没开上中环线呢，友人S君就打来电话。娄老师只好靠边停车……

S：老娄啊，我刚刚看好侬跟刘越直播呀，屏勿牢一定要问侬一声。哎，迭支马来西亚球队到底是啥情况？除脱进球额小鬼头，里厢还有马来西亚人吗？侪是外援啊？

我：哦哟，阿哥啊，我以为出啥事体了，我勒嗨开车子！为了接侬迭只电话，我现在只好捺车子停了马路边廊，算啥名堂？还好我还呒没上中环线哦……

S赶紧赔不是：勿好意思勿好意思，我实在是呒没想通，迭个亚冠联赛现在算啥路子啦？外援可以随便上了？上港此地么是六个外援，对面马来西亚么只有一个正宗马来西亚人，亚足联做啥？寻开心啊？

我：唉，勿谈了……亚足联要改革呀！实际廊就是欢喜搞事体搞脑筋呀……侬听到阿拉前头直播当中讲吗？迭支马来西亚球队，只要伊愿意，真额可以排出11个外援首发出场。比赛开始前头我跟老刘研究伊拉首发名单额辰光直接就讲迭个就赛过是一支西班牙丙级队侬明白吗？一堆西班牙球员+一个韩国人+一个澳大利亚人+一个哥伦比亚人+一个马来西亚人……人家啦就是充分利用亚足联改革额新政策，外援上场呒没人数限制……侬老兄假使有心向看看西亚区额比赛，沙特球队里厢外援也是潮潮翻翻……

S：啊？西班牙丙级队？个么阿拉下趟哪能弄法啦？我看赛程安排，下一轮就是申花客场去打迭支马来西亚队了呀，而且正好是国庆节……

我：迭个么也只好走一步看一步咯……亚足联改革亚冠赛制，改革外援规则，一定程度廊么也是希望推动亚冠联赛额整体水平呀。侬想想看，阿拉中超球队平常有机会碰着西班牙丙级队？多踢踢迭种比赛对阿拉自家额进步是有好处呃……

S：老娄啊，侬道理是讲了呒没错，但是阿拉作为观众看球额辰光吓丝丝额，总归是代表中国足球呀……

我：喂，阿哥啊，国家队跟中超俱乐部队勿是一桩事体呀？0比7这场比赛侬好翻过去来……就算侬今朝还翻勿过去，要么侬先捺我放过去？已经三更半夜来，10点半也敲过来……

S：勿好意思勿好意思，侬快点回去休息，过两天约侬一道喫咖啡哦……