小金人何去何从

娄一晨

前天，我在小区里遇到一位邻居，聊起了小金人奥斯卡和上海海港队是否续约的话题。

邻居：老娄啊，昨日夜里厢看侬讲海港队个亚冠比赛，我就想问侬呀，迭额奥斯卡到底会留下来吗？我看伊比赛结束以后感谢现场观众额辰光激动得来眼泪水淌淌滴，我倒也蛮感动呃。

我：唉，老兄啊，据我晓得奥斯卡实际上也想留下来呃，但是年薪实在太高，远远超出中国足协定下来额外援工资标准，所以搞勿定呀……

邻居：勿是有新闻讲伊愿意降薪一半吗？

我：降薪一半还是太高呀……侬想，奥斯卡现在额年薪是2600万欧元，砍脱一半是1300万，中国足协定额工资帽只有300万，差距还是大得来勿得了，哪能弄啦？

邻居：个么海港俱乐部就呒没想过其他办法来解决吗？老早申花队签德罗巴额辰光勿是就动过脑筋另外签一份游戏代言合同，两条腿走路呀……

我：哈哈哈，侬老兄记性好呃，德罗巴当年额情况还记得清清爽爽。但是侬晓得，迭种生活勿出事体当然是侬好我好大家好，一旦出事体额闲话，外籍球员告到国际足联去，阿拉额俱乐部分分钟拨处罚，所以对俱乐部来讲风险太大……

邻居：个么，还有其他啥办法吗？

我：现在国际廊厢倒是有另外一种变通方式，叫做延迟支付。美国人用了最多。就是俱乐部跟球员签一份长约，比如讲八年，甚至10年，支付额辰光呢采取前头几年少付，后头几年多付额方式。我举只例子：去年年底，美国洛杉矶道奇队，棒球队，跟日本明星大谷翔平签约10年，总价是7亿美元。但是考虑到道奇队每年额工资帽，俱乐部只好跟大谷翔平商量7亿美元额支付方式。结果就变成合同期10年里厢，球队每年只支付拨伊200万美元，10年也就是2000万美元。等到大谷退役之后，道奇俱乐部再掿剩下来额6.8亿美元支付完成。

邻居：啊？迭额吓人，迭额合同日本人也肯签下来啊？

我：是呀……洛杉矶道奇已经140年历史了，球队品牌额知名度信誉度摆了全世界面前。所以大谷翔平愿意相信也敢于相信俱乐部勿会得喇叭腔。

邻居沉默良久，终于又说：我相信美国人俱乐部大概能做到，但是阿拉此地估计随便哪能也签勿出来迭种合同……