准入=混入 输血=飙血

娄一晨

本周一，一纸公告震动足坛，广州足球俱乐部宣布解散。仅仅是一顿晚饭的时间，震动的余波便随着电话波迅速扩散到老娄身边。

友人：老娄啊，新闻看了吗？广州队没啦？恒大足球没啦？

我：噢哟，阿哥啊，我刚刚喫好夜饭侬就来问我介戳人心经额问题啦？侬想要我讲啥呢？

友人：勿好意思影响侬喫夜饭来……我就是想晓得广州队迭支球队真额救勿回来啦？

我：朋友啊，俱乐部活勿下去哪能办啦？侬看到伊拉俱乐部公告里厢讲：由于背负着沉重的历史债务，所筹得资金不足以清偿，最终未能获得准入。说明啥啦？说明冠军奖杯虽然金光锃亮，但是又勿好掿来抵债，更加勿是啥免死金牌……

友人：历史债务我晓得呃呀同样是背负着沉重的历史债务，去年倒拨伊准入了。今年，对勿起，喇一刀砍脱……迭个吓人！

我：哈哈哈，侬老兄迭只问题辣手……一刀砍到总筋廊厢！我只好讲足协还是慈悲为怀，并没想赶尽杀绝。尤其是像广州恒大迭种好歹立过功，为足协挣过面子额俱乐部。所以，只要马路廊厢没啥明显反对意见，没引起公愤，足协当然会得帮侬混过准入门槛。但是，今年马路廊厢有人跳出来了呀，有明显反对意见了呀，有公愤了呀……

友人：我晓得呃……侬讲额就是前两个礼拜韦世豪跳出来发微博额事体啦？

我：是呀……啥叫一呼百应？一个韦世豪，牵出一串蟹。乃么乱来，中国足协一记头拨顶了杠头廊厢。俱乐部对球员欠薪真实存在，而且勿是一个两个。介许多年数阿拉迭点俱乐部为了安抚迭点球员只好一只一只大饼飞出去，先让我俱乐部混过去再讲……迭个生活侬懂额呀……

友人：恶性循环，我懂呃……但是，足协为啥勿好从一开始就严格执行准入标准呢？

我：迭个就是介许多年数一直没解决额核心问题呀……俱乐部自家又赚勿着钞票，只好靠老板或者母公司拼命输血，没血好输了，啊是只好宣布解散啦？

友人长叹：唉，照侬额讲法，阿拉迭只联赛就是浑身上下侪勒嗨飙血额联赛咯？

我：是呀，飙到现在没停过……