足协指导苏超？

娄一晨

前两天，一位友人打来电话，又聊起火爆异常的苏超联赛。

友人：娄啊，我去现场看过苏超来！就是上个礼拜六呀，我正好到南通去。哦哟，这球场里厢闹猛得勿得了，人山人海……

我：哈哈哈，侬老兄开心呃呀，一把年纪了还要去轧闹猛……

友人也笑：是额呀，阿拉几个朋友一直讲要去看看，比较一下苏超跟中超。但是，我今朝要问侬只问题呀。网廊厢新闻讲中国足协出了一个文件要来管理指导苏超联赛了？迭个啥情况啦？

我：足协文件？好像我新闻里看到过一眼，叫啥《社会足球赛事活动赛风赛纪管理办法》。大概就是迭个名字。

友人：对额对额。我看到网廊厢交关人讲迭额就是足协开始动手个信号！苏超假使拨足协接管过去还有啥搞头啦？

我有点诧异：勿对吧？苏超联赛只是江苏省内额一个项目，而且是文化旅游项目，连得江苏省足协也只是承办单位之一。也就是讲，人家省内额活动，又勿需要向中国足协报备，跟中国足协浑身勿搭界，伊哪能接管法子啦？

友人还是有点疑惑：前一腔勿是交关新闻侪讲苏超联赛抢了中国足球额风头，连得中超联赛交关赞助商也一道抢了。所以足协肯定觉着呒没面子……

我马上接过话头：所以中国足协就出台搿能一份文件，正式开始动手接管、指导了？阿哥啊，阴谋论侬叫我哪能讲法啦？侬前头讲苏超联赛弄得中国足协呒没面子是可能呃，赞助商拨抢脱更加要命。但是，苏超迭额生活勿归中国足协管呀！迭额就像美国人里面又有NBA职业篮球，又有NCAA大学篮球，又有NFL职业橄榄球，又有NCAA大学橄榄球。但是，侬职业，我业余，相互独立，各自发展，根本属性就碰勿到一道，完全勿存在啥人管啥人、啥人指导啥人额问题……

友人若有所悟：嗯，侬迭能一讲还是有点道理呃……个么，今后中国足协会伸手吗？

我大笑：哈哈哈，迭额就要看苏超今后发展额情况来……