伊朗队还能去世界杯吗

娄一晨

前天在小区里偶遇一位邻居，聊了一会儿，关于伊朗。不，关于伊朗队……

邻居：老娄啊，搿两天伊朗伊面闹猛啊，打仗打得来……我正好想问侬呀，网廊厢讲伊朗足协主席发表声明讲伊朗队可能呒办法去参加世界杯。是真额吗？

我：老兄啊，侬迭个问题太难来，国际足联现在还呒办法回答侬，叫我哪能讲法啦？只好用一句广告语回答：nothing is impossible。哈哈哈。

邻居：我看到有媒体讲假使伊朗队勿好去额说话，国际足联可以按照规则另外指定一支亚洲球队顶替伊朗队，个么阿拉中国队有希望吗？

我：啊？中国队？哪能可能？侬忘记脱啦？去年18强赛阿拉连小组第四额目标也呒实现，亚洲区附加赛也进勿去，凭啥让国际足联指定阿拉来顶替伊朗队？真额要指定替补，大概率还是要先考虑参加附加赛额几家人家，伊拉克啦、阿联酋啦、阿曼啦，甚至于印尼队，肯定侪排了阿拉前头呃……

邻居尬笑：哈哈，刚刚侬还讲nothing is impossible，哪能到了阿拉中国队此地就变成“哪能可能”了？

我也笑：哈哈哈，我当然也希望阿拉中国队能够再冲进世界杯。问题是，现在迭额生活真额是跟阿拉勿搭界，侬讲啊是？去年下半年额亚洲区附加赛，沙特、卡塔尔出线，阿曼、印尼淘汰。伊拉克跟阿联酋再踢两回合，最后伊拉克赢，掿到半张世界杯门票，马上3月31日要参加洲际附加赛争取另外半张门票。所以，按照国际足联额规则，最有可能顶替伊朗队额应该就是伊拉克，接下来阿联酋顶替伊拉克去参加洲际附加赛。

邻居沉默片刻：唉，讲来讲去啦还是阿拉自家勿争气啦……连印尼也踢勿过，小组第四名也呒机会，一包气……

我只好安慰邻居：老兄啊，算来，覅去穷想来，好坏阿拉也算进过一趟世界杯，中国球迷也算开心过一趟。侬回过头再想想，假使伊朗队真额去勿了勿是更加作孽？而且，国际足联现在最头晕，3月31日马上就要到了，伊拉克哪能办？洲际附加赛到底要踢吗？

邻居愤然：侪是美国人勿好！一切责任尽在美方……