湿热天气要吃苦

文并图/沈一珠

插秧是从前外公种田生涯当中一个比较重要的生产活动。无锡乡下，一年一季或两季的水稻是重要农作物。外公讲，一定要勒芒种前，拿秧苗田里初长成的水稻苗拔出来一捆捆扎好，搬送到大片水稻田里，按规定的间距再次插入田里。过脱芒种，就来勿及了，明年要呒没米吃了。

插秧顶辛苦，还要有技术。阿拉姆妈讲，伊小辰光也做过迭个生活，勿过，勿像人家插的秧，横里竖里，笔笃直；伊弯腰插秧，立起来看看，总归会歪到隔壁弄堂里去。伊讲，伊也试过拉根绳子做规矩，勿过，还是七歪八起。勿晓得是勿是因为迭个原因，后来阿拉外公就拿伊送到上海，进工厂学会了操作刨床，秧插勿好，阿拉姆妈总算可以拿一块块铁，刨得滴角四方，挺挺括括。

芒种入梅是外公讲的。勿过，现在的气象局常常有勿同意见，伊拉欢喜用数据讲闲话，入梅与否，伊拉讲了算。只勿过，从芒种前两日，一歇雨一歇晴一歇风凉一歇湿热的日脚开始了，也是上海人顶顶勿欢喜的日脚。

《黄帝内经》讲，“脾苦湿，急食苦以燥之”，脾脏勿欢喜潮湿，湿热天气里，更加要用饮食来吸潮祛湿，好在初夏日脚里有大量祛湿的苦味食物：枸杞藤、菊花菜、香莴笋，其中，苦得顶顶结棍的要算苦瓜。

假使欢喜吃汤的，可以试试苦瓜汤。选老苦瓜一根，汤大骨一根，盐适量。苦瓜汏清爽，切大块，去籽，剔干净白色内芯，用盐稍许擦一擦，再汏清爽；汤骨焯水，汏清爽，重新加清水，摆汤骨烧滚，撇浮沫，摆苦瓜块，转慢火炖一个钟头左右，再加适量盐调味就好吃了。有人怕苦，欢喜汤里摆一粒蜜枣，味道是好一点，功效就差一点了，看自家欢喜。

又或者，勿欢喜苦汤的，可以选嫩苦瓜塞肉。苦瓜整根汏清爽，切成一寸勿到的圆段，用小刀转着圈挖去籽和白色芯子；肉糜加料酒、盐、糖、生抽、葱花和两只鹌鹑蛋一道搅拌上劲，塞进苦瓜填平，摆放进深盆里，蒸锅放水烧开，苦瓜放入，蒸12分钟左右就可以出锅。苦瓜软糯，因为有了肉糜鲜味的浸润，苦味已经可以忽略勿计了。

做啥要加鹌鹑蛋？一是因为正好冰箱里有，二是因为蛋小水分少，肉糜更加紧实，有咬劲。