大热天里吃刨冰

文/陈日旭

最近辣新民晚报夜光杯浪看到好几篇讲刨冰个文章，让我想起小辰光吃刨冰个情景。

大约摸辣拉三四十年前，热天辰光，上海大街小巷侪有刨冰店，车水马龙个南京路，热闹个八仙桥、王家沙，食品店、冷饮店门口，人头攒动，队伍排得老长，大人小囡、青年情侣侪欢喜吃。

当时我住辣曹家渡，弄堂对过有一爿“王常兴饭店”，就专门辣沿马路个门面浪摆仔一只玻璃柜台卖刨冰。勿要看伊占地狭小，噱头交关好。玻璃橱窗浪贴了面盆大小个“刨冰”字样，离开老远就可以看见。胖嘟嘟个卡通字体，字体浪还有白颜色个雪花装饰，邪气漂亮。柜台里向有一男一女两个营业员，女营业员收钞票，男营业员做刨冰。两个人侪快手快脚，仍旧来勿及做，因为客人太多，队伍一直排到隔壁弄堂口。

刨冰卖一角五分一杯，杯子是有点像花朵个透明玻璃杯，口大底小，看上去扑扑满一大杯，其实容量勿大，搿应该算是生意人个门槛。刨冰口味有四五种：赤豆刨冰、绿豆刨冰、橘子刨冰、柠檬刨冰等等，其中赤豆刨冰又香又甜，还有“嚼头”，最受顾客欢迎，经常会卖断档。

店堂面积大个店，客人可以坐勒店堂里吃，像阿拉曹家渡搿种小饭店呒没介大地方，主要是外卖。其实对我来讲，还是比较欢喜买回去吃。一种是乘风凉个辰光，用大号搪瓷杯买回来，辣拉马路边浪吃。一种是端一只小锅子去多买点，回到屋里一家门一道吃。还有一种吃法，就是拿一只西瓜剖成两半，用调羹挖出一个坑，拿刨冰倒进去，搿能一来，西瓜更凉，味道也多样化。假使屋里来了客人，用搿种方式招待邪气有面子。

一杯刨冰个价钿比一根棒冰贵，但是刨冰勿但口感更加好，而且降温效果也更持久。记得有一年热天，单位里买了好几张天蟾舞台个京戏票，好几个同事从西区中山公园出发，乘电车到人民公园，我师傅讲，走过去有一段路，蛮热咯。辰光还早，我请大家先到对面吃杯刨冰，再荡过去。就搿能，四五个人到对面堂吃刨冰一杯，再走到戏院。一路走说说笑笑，轻松愉快，交关适意。

辰光过得老快，几十年好像眼睛一霎就过去了。到了现在，刨冰已经难觅踪影，各种冰品店里侪是奶茶、冰激凌。再讲，现在家家有空调，有冰箱，自家屋里就可以制冰，做冷饮，啥人还稀奇勿煞老早个刨冰呢？