舞茸翩翩拌杮子

文并图/沈一珠

秋风秋雨，草木黄落；却有舞茸，鲜香婆娑。

秋天日脚，就算是人工培养个菌菇，也更加好吃一眼。搿是因为，秋风会让菌菇里个菌变得活络；菌菇有“伞”，伞里有伞撑，密密麻麻，迭个就是菌菇个孢子，是菌菇生长个原动力，是氨基酸，是阿拉欢喜个营养搭仔能量，当然，也是菌菇之所以老好吃个命门；也所以，菌菇好吃，勿好多吃，否则身体吃勿消。做事体搭仔吃物事一样，适可而止就好。

舞茸是秋天菌菇里比较有情调个一种，据说，从前侪是野生个，比较稀奇，觅着了，可以去换交关铜钿，所以山里寻菌菇个人，一看到伊就会兴奋得手舞足蹈，伊也就被叫作舞茸。再想想，也可以有另外一种理由，勿管远看近看，伊侪像一条质地极好、做工繁复、皱裥丰富个舞裙，轻轻捧勒手里，有裙摆翩翩个感觉。

舞茸本名叫灰树花，迭个名字属于写实主义，一蓬棕灰调子个花朵，又淡淡交镶一圈米白调子个边，颜色搭得斜气高级。

讲来讲去，好吃是顶要紧个。灰树花勿像大部分菌菇，软绵绵，滑搭搭；伊口感比较爽脆，用高温油快速炒熟，封牢伊个香味，合好咸淡，拌饭蛮入味个；或者是选几样秋天当季食材，拌一拌，老好。比方讲，菌菇拌杮子。

准备一小盒灰树花、一只火晶红杮子、半盒绢豆腐、几粒白果、一点白芝麻、一点芝麻酱。绢豆腐比较硬扎，适合冷拌；切小块，焯水、沥干；稍许硬一点个火晶杮子一只，去皮切成小块，撒点盐腌一歇；三五颗白果烤熟，去壳；灰树花汏好，吸干水分，锅子里烧热油，拿灰树花一瓣瓣拆开摆下去，勿要多翻，煎到焦黄，会有种海鲜味个咸香，撒点盐盛出来。用一只深盆，拿适量芝麻酱、盐、生抽拌成酱汁，豆腐摆下去拌匀，再依次拿灰树花、柿子和白果摆下去拌匀，撒点熟个白芝麻，软绵绵，糯笃笃里向，灰树花爽脆鲜香，让人惊艳。