我也拨孙囡写封信

文/钱红春

孙囡今年十四岁，是初二学生。前几日伊辣微信里讲第二天要参加学堂里组织个秋游。后来我才晓得，搿趟勿单单是秋游，还是学堂为整个年级学生举办个十四岁集体生日。

十四岁，是天真烂漫个花季年龄；是从懵懵懂懂向独立思考个转变；是用自家眼光观察世界个开始，当然也是人生比较重要个阶段。伊爷娘分别拨伊写了信，一字一句充满鼓励搭仔关爱。

我作为爷爷，哪能好闷声勿响呢？于是，我也想拨伊写封信。写点啥呢？伊爷娘讲过个闲话我勿再重复，就讲讲我同伊一样年纪个事体。

我辣信里告诉伊，我十四岁辰光是一九五七年，辣中山北路靠近武宁路一所初级中学读书。学堂离屋里勿远，中浪回屋里吃好饭还可以白相一歇。当我刚刚升到初二，屋里搬到了鲁班路靠近中山南路，去读书个路线一记头变得老远，一路浪要转乘两部公交车，来回要四个多钟头。当时学堂里规定学期中途勿好转学。当我好勿容易熬到升初三，学堂里又讲毕业班个学生勿许转学。我每天起早摸黑上学放学，直到初中毕业，考进屋里附近个高中，搿种每天忙于赶路个生活总算结束了。

我还辣信里讲，当时我爷娘收入勿多，供我读书已经勿容易，葛咾平常呒没零用钿。自从要乘车子读书，我就想办法节省车钿，好让自家活络活络。上学勿好迟到，车钿省勿下来。放学我就乘车子加走路，省一角或者五分。碰着礼拜六下半日勿上课，我就“雄赳赳气昂昂”一路走回屋里。我就靠省下来搿眼“脚路钿”，除脱买书，买学习用品，还买自家欢喜个物事。

有桩事体我现在还记得清清爽爽，有趟礼拜六中浪放学，我走到静安寺个辰光，看到马路边浪有爿新华书店，就进去兜兜看看，顺便歇歇脚。我辣店里看到一本欢喜个书就买了下来。走出店门，一看辰光勿早，就乘车子回屋里。从静安寺乘到屋里要买一角车票，但我摸遍袋袋只有五分，就准备先乘几站路，再下车走回去。啥人晓得辣座位浪困着了，等我醒转来一看，已经过脱车票规定个下车站头。我下车个辰光拨售票员拦牢，要我补票。我身浪呒没钞票，就被带到终点站，交拨站里向处理。还算好，我是“老乘客”，后头一部车子个售票员认得我，关照我“下趟当心点”，就让我离开了。我从公交终点站一路走回去，到屋里已经天黑了。

孙囡个阿爸曾经辣国外十几年，一边打工一边读书，现在是一名老师。有一趟，伊同我茄山河，讲起“吃勿着苦个苦，才叫真个苦”。我辣信里最后，拿搿句闲话也送拨了孙囡。

孙囡读仔我搿封信讲：“我晓得了，我会好好交努力嗰。”