小辰光元宵看鹞灯

文/严志清

风筝，辣阿拉月浦地区叫“鹞子”，小辰光过年，我最欢喜看人“放鹞灯”。啥叫“放鹞灯”呢？就是辣风筝线浪挂灯笼，等风筝飞起来了，灯笼也就升到空中，搿就叫“放鹞灯”。一根风筝线浪可以挂几盏灯笼呢？搿就要根据风筝大小来定，风筝越大，升力越大，可以挂个灯笼越多。记忆里，少一点嗰挂七八盏，多嗰可以挂廿几盏。可以讲，元宵节放鹞灯曾经是阿拉月浦地区个一种习俗，也是拨我留下最深刻印象个一种新年娱乐活动。埃歇辰光，到了元宵节个夜里，田头路边总能看到有人放鹞灯，周围则是开心得又叫又跳个小朋友。勿到灯灭人散，阿拉搿点小朋友是勿肯回去嗰。

放鹞灯个鹞子一般用平面蝴蝶鹞，因为搿种鹞子不仅承载力大，而且放飞稳当可靠，假使吃着“上界风”，就好像贴辣天浪向一样，一动勿动，稳如泰山。

放鹞灯要几个人通力合作：一个人牵鹞线，一个人用麻线拿灯笼缚到鹞线浪，两个人负责点蜡烛装灯笼。每盏灯笼个灯线至少长1米，而且长短要一样。每盏灯个间隔大约三四米，灯距要均匀，迭能一来，等灯笼升到高空，看起来就邪气整齐好看了。挂好最后一盏灯，还要继续往天浪放线，让灯笼侪能升到一定高度。因为村村宅宅、各个街镇侪有放鹞灯嗰，远远看去，一排排明灯高挂天空，同天浪个星星、月亮交相辉映，邪气壮观。

迭个辰光，人立辣地面浪已经看勿到鹞子了，想要晓得天浪鹞子个情况，主要靠听声音。声音从啥地方来？声音从鹞子背浪向来。放鹞灯个鹞子背浪侪有竹簧琴，也叫鹞琴，高空气流吹过鹞琴就会发出一种嗡嗡声，听起来蛮好听嗰。假如琴声和顺，说明鹞子飞得平平稳稳。假如琴声忽高忽低，说明风势勿稳，鹞子晃动厉害，就要当心了。

鹞灯好看，更加好白相个是“走仙（线）蝴蝶”。搿种蝴蝶大约一尺见方，两片翅膀可以张合，下面装有滑轮，还装有机关。放飞个辰光，先让两片翅膀张开，用鹞线穿过滑轮，辣蝴蝶机关个枢纽浪挂一串鞭炮，辣鞭炮下面个火药线上浪绑一小段点燃个线香。辣风力个推动下，张开翅膀个蝴蝶就会沿着鹞线快速上升，直到碰着“鹞挡”停下来。啥叫“鹞挡”？最后一盏鹞灯挂好以后，辣距离灯笼三四米个鹞线浪缚一根筷子或者竹条，勿让“走仙蝴蝶”靠近灯笼，搿就是“鹞挡”。等线香烧到火药线，鞭炮就噼里啪啦响起来了。等鞭炮响完，触动机关，蝴蝶翅膀就会合拢，蝴蝶就从鹞线浪滑下来。迭能反复白相，趣味无穷。

可惜到了现在放风筝嗰勿少，鹞灯基本看勿见了，放鹞灯已经成了小辰光记忆里个开心事。