想起当年看电影

微信扫码看视频听钱程沪语朗读

文/喻平官

我从小欢喜看电影，电视剧《繁花》热播，勿断出现国泰电影院，勾起了我老底子看电影个情愫。

我1947年出生，屋里住勒瑞金一路、长乐路口，对面就是现在个新锦江大酒店。从屋里出发，朝西走100米，就是茂名路口个兰心大剧院。到了兰心大剧院左转，沿茂名路走到淮海路，国泰电影院就到了。从国泰电影院朝东，过瑞金一路到成都路，就是淮海电影院。走得再远一眼，南京西路、陕西路有平安电影院。朝东到嵩山路，还有嵩山电影院。屋里附近有介许多电影院，让我有了看电影个地理优势。

看电影需要钞票，当时屋里兄弟姐妹六个，加上爷娘外婆一共九个人，侪靠阿拉阿爸六十几元个工资生活。尽管家境勿宽裕，阿爸还是经常拨我一点零用钿，每次一分两分，我积起来，有了一角两角就去看电影。落笔至此，深感父爱伟大。覅小看一角两角，当时弄堂口烟纸店里，盐津枣、花生米两分洋钿一小包，奢侈品咸鸭蛋一角洋钿一只。

葛末，一角两角能勿能看电影呢？可以，也勿可以。为啥迭能讲？因为当时新电影上映，勿是所有影院同时放映，而是分批放映，有先后个。国泰电影院、大光明电影院就是首轮影院，有新个电影先勒了首轮影院放映。接下来么轮到第二轮影院，譬如淮海电影院。平安电影院搭至嵩山电影院一般放映旧片，算是第三轮影院。勿同影院有勿同个票价。首轮票价三角，第二轮两角，第三轮一角五分。由此可见，对我搿个穷学生来讲，经过国泰电影院门口，只能看看贴出来个电影海报唻。我平常去得最多个是平安、嵩山等第三轮影院。偶尔，我也会去淮海电影院买一张学生票。礼拜天早浪八点钟经常有学生场，票价一角，一般放映国产旧片，譬如《铁道游击队》《上甘岭》《野火春风斗古城》等等，还有《三毛流浪记》《鸡毛信》等儿童片。

我欢喜看译制片，譬如《彼得大帝》《海军上将乌沙科夫》《奥赛罗》《孤星血泪》《王子复仇记》等等。法国影片《勇士的奇遇》既有传奇冒险，又诙谐幽默，扮演主角个杰拉·菲利浦演技精湛，可以搭《佐罗》里个阿兰·德龙媲美。印度电影里载歌载舞个场景勿少，当时感觉蛮闹猛，但是现在还记得个只有《章西女皇》和《两亩地》了。意大利影片《警察与小偷》让人好笑又心酸。《罗马十一点钟》催人泪下，影片结尾交关求职者轧坍楼梯……记得当时勒了平安电影院看夜场，散场以后我从陕西路走回去，搭电影里个罗马勿一样，上海个夜晚静谧温馨。

记忆里国泰电影院有辰光会放映外国原版片，对我迭个小朋友来讲，感觉太“高级”了，呒没看过，现在回想，有点可惜了。

重温旧事，勿能勿讲跑片趣事。之所以影院分轮次，就是因为电影拷贝少。新片上映，几家影院同时放映，但是电影拷贝勿够，只能错开放映辰光，拿电影拷贝送来送去。当时经常可以看到跑片员蹬仔脚踏车到处跑，装电影拷贝个帆布袋挂勒了车子浪。有辰光路浪出了一眼意外，呒没及时送到，银幕浪就会打出“跑片未到”个信息。碰着搿种情况，电影院会放十分钟纪录片填补，或者干脆亮起长灯，休息静候。

电影就搿能陪我度过了少年时光。1963年我进中专读书，勒学堂里住读，就勿大进电影院了。后来又去苏州工作，彻底告别上海个电影院。时隔大半个世纪，每每回忆，温情犹在。