听老人讲老话

文/冯济民

我是自家大家庭里个长房长孙。按老法讲，我勒屋里个地位是老高嗰。勒外公大家庭里，我是第三代里最早出生嗰，也特别受到长辈个信任搭仔关爱。由此，屋里向个祖父祖母、外公外婆、舅舅姑妈侪欢喜搭我讲讲老话。

老话内容斜气广泛，主要是家族历史、轶事，老早发生个事体搭仔一眼谚语咾啥。比方“棋输木头在，输了重摆摆”“七十勿留宿，八十勿留饭，九十勿留坐”“茶七酒八”之类。

“棋输木头在，输了重摆摆”意思是下棋输了不要紧，还能再决胜负。泛指失败了不要灰心，只要有信心，就可以从头做起。

“七十勿留宿，八十勿留饭”意思是70岁以上老人到侬屋里拜访，勿要挽留伊住宿；80岁以上老人来访勿要挽留伊吃饭。因为老人年纪大了，勒陌生地方留宿，勿熟悉环境，容易发生意外，所以要避免让老人勒外面留宿。

“茶七酒八”意思是勒屋里招待客人，为客人斟茶，覅拿茶杯倒满，倒七分满就可以了，因为古人认为“茶满欺客”。倒酒个辰光，也覅倒满酒杯，倒八分满就可以了。搿既是一种待客之道，也是一种饮食文化。

老人肚皮里老话多，讲起来滔滔勿绝，我斜气欢喜听，还欢喜问。老人看我欢喜听，讲得更加起劲。现在个年轻人勿欢喜搭老人相处，更勿愿听老人讲老话，称其为“代沟”。迭个是勿对嗰。俗话讲“人老话多”。老人个人生是一本丰富个教科书，伊拉所听到嗰、看到嗰，亲身经历过个喜怒哀乐，曲折坎坷，对后代侪具有一定个教育搭启迪作用。可惜现在个年轻人很少愿意耐心去听，去陪老人讲讲闲话。

趁老人健在，希望年轻人多陪陪老人，听伊拉讲讲老话，也是一种尊老敬老爱老个具体表现。