春日蚕豆忆旧味

◆ 钱红春

春天头一批上市个蚕豆，连壳一道嚼，觉着老酥老嫩个，味道交关灵光。不过呀，我小辰光吃到个蚕豆，全部是石刮铁硬个老蚕豆。

我个老家离上海交关近，小辰光常常有亲戚朋友到上海来白相、出差或者看医生，有辰光就要辣我屋里向落脚。伊拉每趟来总归要带点炒麦粉、糯米粉之类个农副产品，其中老蚕豆是每趟勿可少个物事，一带就是好几斤。

爷娘当时收入勿多，平常省吃俭用惯了。哠咾我也呒没啥钞票买零食。有辰光看我嘴巴馋得来，实在熬勿牢，就会抓几把老蚕豆放到铁镬子里去炒，炒到豆壳浪有点焦，闻着有一股香味道，豆就炒好了。等到冷透，我就搲一把囥到袋袋里当零食。搿种炒蚕豆硬是硬得来，牙齿勿好个人，要咬得眼乌珠弹出啦。哠咾也叫“硬蚕豆”。老蚕豆还可以浸辣水里向，泡脱几天，等到发芽以后，用来烧小菜吃，是一般人家个家常菜。搿种发好芽个蚕豆就叫“发芽豆”，小菜场里也有得卖个。我小辰光顶欢喜吃个就是豆瓣酥搭豆瓣汤。不过搿种吃法也比较麻烦个，就是要拿蚕豆一劈两爿，剥落豆壳变成豆瓣。

蚕豆为啥要劈开来呢？一是老蚕豆个豆壳邪气硬，勿大好剥。就算辣水里泡过后，豆壳变软了，剥起来也是蛮吃力个，手指甲吃勿消。劈成两爿，剥起来就便当多啦；二是老蚕豆因为放个辰光长，豆里向有蛀虫。有个豆壳浪有洞眼，蛀虫已经跑脱。有个蛀虫还辣豆里向，外头看勿出，只有拿豆壳剥脱，才能够看得见，才能汏清爽。黑颜色个蛀虫虽然呒没毒，但混辣小菜里向，吃起来总归觉着倒胃口；三是蚕豆劈成两爿以后，烧起来容易酥。

我是屋里向个长子，小辰光常常帮屋里向劈蚕豆，其中也是有点小门槛个。

劈蚕豆个辰光，先要拿菜刀倒放辣台子浪，用一只手个手掌根部揿牢刀柄，手指头捏牢要劈个蚕豆，并且要拿蚕豆有黑线条个一头对牢刀口扶好。另外一只手就拿根木棒头对准蚕豆“笃”一记敲下去，多敲几记到蚕豆劈成两爿为止。劈好个蚕豆就随手丢到有水个碗里向浸泡。劈蚕豆个关键是菜刀一定要扶正扶牢，一眼勿好歪脱。蚕豆也要同菜刀保持垂直。否则个闲话，邪气容易劈豁边。因为蚕豆别个地方又圆又滑，再要重劈就难了。记得有一年放暑假，我劈蚕豆个辰光推板一眼闯穷祸。搿天早浪向，我身穿汗衫短裤，脚浪穿木拖板，一个人辣门口小台子浪劈蚕豆。劈到一半，有小朋友来喊我白相。我一分心，菜刀呒没揿牢，从台子浪落下来，推板一眼刀锋斩到我脚背浪，吓得我出仔一身冷汗。

当时辰光乡下头种粮种菜侪是按照季节播种个，一眼勿好推板。新鲜个蚕豆收起来，马上要种别个物事，上市辰光交关短，价钿也贵，爷娘勿大舍得买。我对老蚕豆，特别是对劈蚕豆个印象深得勿得了。