谷雨春播正当时

◆小申

春天到了，种田人开始准备稻田个秧苗了。电视里看到，现在交关地方个水稻侪是工厂化育秧、机械化操作；比起当年，劳动强度减低、生产效率提高，进步了勿是一眼眼！我廿岁出头上山下乡个辰光，曾经勒农场里种过水稻，回忆起来其中育秧环节也算是一项有“技术含量”个生活。

育秧第一道工序是选种。虽然前一年已经留了颗粒最饱满地块个稻谷做稻种，里向仍旧难免混入瘪谷，甄别个办法是弄一大缸泥浆水，拿稻谷倒进去；因为泥浆水比重比清水要大，勿太饱满个谷粒就会氽起来，用爪篱撩脱，剩下了个就可以用了。浸湿个稻种要堆放进一间空房间里，密闭窗门让伊焖了海发热、发芽。每天还要轻轻翻拨、洒水，保证谷堆里外湿热一致，同时发芽。几天后，稻谷外面看到有个白点出来，就是发芽了。

搭准备稻种同时要做个另外一桩技术生活，是做“秧板田”。田块要经过反复耖刮，烂泥勿好有一点结块；整好个垄埭高出稻田里个水勿足一公分，像一块块水门汀板，轮廓煞清、表面煞辣势平！搿是看真功夫个。一般女生比较耐心细致，秧板田最后总归交拨伊拉收头。但是早春三月赤脚立了水稻田里，对小姑娘来讲也是真生活！

挨下来拿发芽个稻谷均匀撒到秧板田浪（称作落谷），又是勿简单个事体。一只手要靠腰眼支撑，夹牢摆稻种个大畚箕；另外一只手一把把撒出稻种。光有力气还勿来事，撒落个谷子要散开成一个面，而勿是弄了一作堆，垄埭边浪要撒出一条疏密适宜个直线来，搿种手势呒没两三年光景个锻炼是蛮难做到个。

现在稻田还是搿片稻田、种稻还是需要秧苗，但是老早费工费力个做法已经慢慢叫拨机器设备、智能程序等新技术手段代替了，值得夸耀个勿再是能工巧匠个个人能力，而是现代化农业个综合水准。