揭不开锅

娄一晨

没有比赛的日子里，世界各地的体育舞台纷纷偃旗息鼓、鸣金收兵。结果才鸣了几天金，各大职业联盟和职业俱乐部就发现自己快揭不开锅了。

本周，球迷友人又来电话。

友人：唉，娄兄，我看到新闻里厢讲欧洲好几家俱乐部开始叫球员降薪了，而且一枪头降了蛮吓人呃！是真个伐？

我：侬新闻也已经看到了，还要来问我真假？侬意思讲媒体放出来呃侪是假消息咯？

友人不忿：哼，现在是铺天盖地消息太多，啥人晓得是真是假……我只是想问侬像新闻里厢讲到呃巴塞罗那咯、尤文图斯咯，还有拜仁，迭眼侪是豪门俱乐部呀，哪能介快就撑勿牢，需要球员来降薪啦？

我：迭个正常呃呀！侬想想看，现在比赛全部停忒了，球迷观众全部侪关了屋里厢，俱乐部啥地方还有收入呢？门票呒没了，相关商品销售呒没了，最重要个是电视转播个分成呒没得了……侬讲讲看，阿是损失惨重伐啦？

友人：嗯，但是我就是有一点勿懂呀，像伊拉迭种豪门俱乐部，难道银行账户里厢个流动资金介快就流清爽了？

我大笑：哈哈哈，阿哥啊，侬迭只问题直接戳人家心经呃，好伐？

友人小得意：是伐啦？问问题嘛就是要问了到位！

我：今朝我看到英国《每日邮报》有一篇文章，分析目前迭种状况会得对俱乐部带来多少损失。正好，我拿文章转发拨侬，大家一道来看一看。

微信转发，友人收到。

我：侬看到伐，文章里厢有一张图片，每支球队预计的损失情况侪有了。第一排就是电视转播分成的损失，曼联4800万英镑、曼城5360万英镑、利物浦5520万英镑、切尔西4930万英镑。第二排是比赛日收入，就是球场门票啦、餐饮啦、停车费啦，曼联1760万英镑、曼城1390万英镑、利物浦1360万英镑、热刺1680万英镑、阿森纳1540万英镑。

友人插话：切尔西哪能比赛日收入介少啦？只有1090万英镑？比其他几家少交关嘛？

我：切尔西么，球场小呀！曼联球场最大，现场观众最多，所以比赛日收入也就最高。乃么侬了解为啥迭眼英超豪门侪要造新球场了伐？曼城、热刺、阿森纳，对伐？

友人：嗯，有道理呃……

我：再看第三排，商业赞助及衍生品零售，就是球场广告牌、球衣冠名啊、球衣销售啊，还有各种纪念品销售。侬看，曼联要损失5080万英镑，曼城是4170万英镑，利物浦3380万英镑，切尔西3090万英镑。所有三个项目加起来，曼联要损失1.16亿英镑，曼城利物浦两家也要损失到1亿英镑以上。所以，侬讲讲看，阿是需要球员一道来降薪伐？

友人：我懂呃！但是，侬呒没回答我刚刚个问题，为啥俱乐部流动资金介紧张？

我又笑：喂，朋友，赛季还呒没结束好伐？交关大收入还呒没来了呀……侬想想看，电视转播分成、联赛排名奖金、欧冠奖金、欧冠电视分成，侪要等到赛季结束再结算的好伐！侬以为是啥？每一轮打好就可以去寻电视台拉米？就可以到欧足联去讨钞票？啥地方有介好个事体……

友人称是。