中超今年还开赛吗

娄一晨

就在前天，我那位球迷友人又来电话了……

友人：娄兄，侬一定要讲拨我听，短命个中国足协到底啥情况啦？今年额中超联赛到底还踢吗？

我赶紧劝：阿哥啊，侬慢慢交讲，覅激动，千万覅激动！为了中超联赛，更加呒没必要！

友人：是吗？是吗？我上额号头就打电话问过侬迭个事体，对吧？当时辰光我还蛮开心个，觉着中国足协就算再哪能介拖拉，中超联赛6月份里厢开始比赛应该是呒没啥问题呃。啥人晓得现在已经一个号头过忒来，阿拉只看到足协之前报上去额方案拨总局枪毙忒！迭个算啥么事啦？白相阿拉球迷额感情咯？

我只能感叹：唉，老兄啊，中国足协有难处呀……

友人：娄兄，我最勿要听额就是侬讲足协有难处！难了啥地方？啊？人家德国联赛勿是5月份就恢复了？到现在已经踢了一个号头了，马上本赛季就要正式结束了！人家韩国联赛勿是5月份也开始啦？接下去英超西甲意甲日本联赛侪要恢复了，中超联赛勿是号称世界第六大联赛吗？老实讲，侬是勿是第六大阿拉球迷无所谓，各么侬第六个恢复总可以吗？

我：唉，阿哥啊，勿是侬想象了介便当额……

友人怒气未消：好，各么侬倒讲讲看，中国足协难了啥地方？CBA马上要恢复了，中国足协一点腔调也呒没……

我：喏，首先就是疫情防控个风险，对吗？足协最早个方案还是想保留主客场。但是介许多球队乘飞机火车跑来跑去，风险实在是大勿过。所以第一只方案通勿过是老正常额！现在侬看到额新闻里厢报出来额新方案已经变成了赛会制。为啥？就是为了避免主客场跑来跑去呀……

友人：迭个阿拉侪懂额，赛会制阿拉能够接受个。各么为啥就勿能快点通过呢？

我：唉，通勿过一定说明里厢摆勿平呀！比如讲，有交关球队外援还呒没回来，甚至于主教练也呒没回来。迭个生活多少难弄啦？

友人：外援呒没回来么只好算天灾人祸咯？特殊情况呀？又勿是勿拨伊拉回来……

我：呵呵，迭个里厢勿是就牵涉到公平勿公平了吗？侬讲讲看，凭啥侬可以外援到齐，我只好用全华班？迭个侬足协总要照顾一下吧？

友人：啊？迭个也好谈条件啊？要么学习CBA，有外援个球队碰到八一队侪要减少外援人次？

我：另外，赛会制OK呃，但是凭啥要叫我广州额球队跑到上海？上海额球队跑到广州？讲好是空场比赛，呒没观众到场，侬还担心啥主场优势？

友人：是额呀！迭个一点真个是莫名其妙！现场又呒没观众，勿晓得足协担心点啥么事。

我：哈哈，乃么侬晓得了？中国足协要做点事体，难吗？

友人：有观众也怕，呒没观众也怕。有外援勿好，呒没外援还勿好。索性拿联赛关忒最太平！反正按照现在迭只套路发展下去，辰光已经勿够了……