骂山门骂错方向

娄一晨

前天，两位老友，W和S，来电“兴师问罪”。

W ：哈哈哈，阿拉就是想问侬呀，迭两天冯潇霆啥情况啦？为啥帮巩汉林吵相骂了啦？还要写介长一篇文章反击？

S：喏，老娄，我觉着巩汉林骂了没错，中国队水平介差还要捺介许多钞票，就是应该被大家骂！侬看看伊拉迭帮人年初一踢个啥么事？想想就是一包气！恐韩恐日恐伊恐澳，再下去就是恐越南来……

我：哎哎哎，两位阿哥，中国足球拨骂了还少啦？记得《吐槽大会》里厢范志毅讲个闲话伐啦？小郭啊，就是郭艾伦，你们篮球，才是挨骂挨少了。所以啦，关键勿是中国足球拨骂了太多还是太少，而是巩汉林没骂对地方。

W ：啊？个么侬讲应该骂啥地方呢？

我：要骂么就应该骂是啥人拨伊拉介许多钞票！为啥要拨伊拉介许多钞票！对伐？我一直认为球员也是凭本事吃饭，俱乐部老板愿意拨伊拉介许多钞票侬叫伊拉勿捺啊？高风亮节？勿捺倒有鬼了！对伐？

S：老娄啊，侬迭个讲法我勿同意。人家俱乐部老板掼大钞票多少还是因为欢喜足球呀！自家肉里分掇进去，侬哪能骂伊啦？侬看人家切尔西个老板阿布，19年捺了多少个冠军？到最后拨英国人白相成啥样子？人家就是真爱呀。

我：朋友，阿布是勿容易。但是侬首先要看清爽当初伊为啥要收购切尔西俱乐部？伊看中个是啥么事？看中个是整个英超联赛英国足球良好个市场环境，良好个发展前景，良好个盈利能力。阿拉有伐啦？到现在为止，阿拉中超联赛里厢泡沫有多少？票房有多少？俱乐部分红有多少？版权好卖几钿？

W ：迭个倒是个。此前中超联赛版权卖脱5年80亿，轰动啊，到最后还是变成一则笑话。

我：所以呀，拨我讲起来，所有中超俱乐部个老板应该是共同努力来争取创造一个良好个足球环境、足球市场，让大家看到觉着有前途有希望，就像阿拉隔壁头日本联赛一样。侬晓得人家日本人个联赛只比阿拉老早个甲A联赛早开始一年，但是人家现在三级职业联赛已经有得58支俱乐部队来。就是老老实实从培养环境、培育市场开始做呀。

S：个么老娄侬意思阿拉应该哪能办呢？

我：呵呵，抄作业！抄日本足球个作业！老老实实学习日本足球30年个经验，联赛组织运营啊、俱乐部经营啊、青训培养啊、市场开发。

两位老友在电话那头沉默良久，突然异口同声：还是让巩汉林继续骂球员伐……