泰森侬醒醒呀

娄一晨

本周一夜里，快10点钟了，微信里有朋友发来一张图片，上面用中英文写着：10分钟前，迈克·泰森死于医院，再见传奇迈克·泰森……

文字下面的配图是一张泰森胡子花白的近照。还有另一张：一个病人躺在病床上，口鼻中插满了急救用的呼吸器的管子。

啊？真的假的？

我赶紧上网查阅一些美国体育媒体的网站，希望能找到一些相关的新闻报道。结果，什么也没有。

于是忍不住打电话给这位朋友。

我：喂，朋友，啥情况啦？侬啥地方看来个泰森额新闻？假新闻？

朋友：我也勿晓得呀……我也是刚刚收到别人发过来额迭张图片，顺手就发拨侬老娄了。我想侬做体育额，总应该比阿拉消息灵通咯？

我：喂，老兄啊，侬好好交，泰森虽然已经消失交关辰光了，但是总归是世界级名人。假使伊真个生啥毛病走脱了，新闻老早就铺天盖地了好吗？侬看看现在额新媒体，抖音啦、头条啦，多少发达？一有风吹草动分分钟往侬手机廊厢推送新闻，是哇？

朋友：唉，我是勿相信迭种小道消息，所以想寻侬娄兄求证求证……

我：所以呀，刚刚看到侬迭张图片发过来，我马上就上网去查了呀。美国ESPN、CNN、FOX格几家网站廊厢根本就寻勿着……假使真额有消息额闲话，绝对侪是头条新闻额规格。侬讲呢？

朋友：嗯，格么就更加说明是假新闻了咯？但是，为啥要传迭种假消息啦？泰森又跟啥人结仇了？

我：啥人晓得？大概只好迭能介来分析：整个拳击项目也已经走下坡路走了交关辰光来，大家勿关心拳击运动已经多少辰光了？要么就是泰森自我炒作，哈哈哈，我想伊应该呒没吃了介饱……要么就是有人想借伊额知名度骗一眼流量，但是我也呒没想出来迭点流量好派啥用场……

朋友笑了：哈哈，侬倒是想了蛮多额嘛？

我也笑：喂，老兄啊，我是拨侬拖进来了好吗？真额也就是现在手机上网快，查资料便当，几分钟看一看就结束了，否则我啥有介空？

朋友：哈哈哈，既然侬有的介空，格么就拜托侬老娄明朝手机上网再查一查，假使泰森自家出来辟谣额闲话，侬也发一张截图拨我，算报复我。啊好？

我：我认得侬哎……