忏悔的泪水盈满眶

娄一晨

本周二晚上，娄老师继续和家里面女同志一起追《繁花》。

突然有朋友来电：老娄啊，央视一套专题节目，李铁、陈戌源出来坦白来！哦哟，迭个陈戌源哦，哭得来眼泪水刹也刹勿牢……

我：啊？朋友，迭个节目侬也看啊？侬覅影响我看《繁花》，今朝最后两集，大结局！

友人：唉呀，我晓得额呀，我就是想等到《繁花》30集全部出来再看额呀。所以今朝老认真勒嗨看李铁、陈戌源呀！我就是想问问侬之前勿是有图片出来讲李铁头发侪拨剃光了吗？哪能呒没剃光啦？伊还吹头发？

我：哈哈哈，侬迭只问题我身边交关人侪来问过……我只好讲吹头发是李铁人生转折额一种标志！吹头发之前是大家最初印象当中额李铁，吹头发之后就是另外一个新李铁来……

友人：哦哟，老娄，侬迭个结棍额，一记头掿前后两个李铁分了清清爽爽了！前头一个是相对单纯额球员，后头一个就是现在出来认罪忏悔额原国家队主教练……

我：是呀……小辰光看《三国演义》，印象深刻额一段就是孙权上书拨曹操劝进。结果曹操哈哈大笑帮手下头人讲“是儿欲使吾居炉火之上耶！”摆到李铁、陈戌源身廊一样好用，足协主席国家队主教练就是火炉呀，坐上去就是拨火来烤额！侬是真金，烤也烤勿坏。个么迭个世界廊厢有几个人是真金啦？是勿怕烤额啦？

友人长叹一声：唉……我真额呒没想到一个足协主席，一个国家队主教练，居然好收钞票收到搿种程度！而且还是勒嗨前头介许多原主席原副主席拨捉脱以后……迭个太吓人了……

我：所以啊，迭个就是诱惑呀，大到侬呒没办法想象，大到侬呒没办法抗拒，大到侬横下一条心帮自家讲——老子拼了！火炉？勿坐到搿只火炉廊厢我还呒没收额机会来……我就勿相信我运道介差！

友人又长叹：唉……个么就呒没办法彻底解决吗？

我：我只好讲李铁坏就坏了头发长，有得吹。假使伊像我一样留只板刷头，头发没得吹，个么也就用勿着去坐迭只火炉，用勿着上央视一套认罪忏悔来……

友人大骂：滚！

挂断电话，突然想起《繁花》第二集结尾处，夜东京饭桌上，葛老师领唱沪剧《昨夜情》选段：忏悔的泪水盈满眶。玲子冲入画面：昨夜情，今朝思。千古恨……（咬牙切齿，还带笑）

马伊琍演得真好！影后级！