癞痢头儿子自家好

娄一晨

前两天吃过晚饭出门倒垃圾，娄老师偶遇一邻居，“被迫”又聊起了国足。

邻人：哎，老娄啊，侬好呀！巧来巧来，正好问问侬呀，迭个礼拜阿是国家队又要踢世界杯预选赛啦？

我：是呀，礼拜四夜里厢，国家队客场踢新加坡。下个礼拜二，国家队回到主场，跟新加坡再踢第二回合。

邻人：对额对额，踢新加坡两场阿拉总归好赢了咯？

我：唉，老兄啊，作孽啊……侬叫我哪能回答侬呢？我只好讲假使赛程安排反一反，中国队先踢主场再踢客场，个么大概率能够两场全赢！但是现在是礼拜四先踢客场，下个礼拜再踢主场，我心里厢就要抖豁来……

邻人：勿会额，新加坡又呒没啥实力额咯？

我：侬讲了呒没错，新加坡实力差实力推板大家侪晓得额。问题是阿拉国家队能勿能掿自家个实力正常发挥出来呢？过年前头亚洲杯大家侪看到额，三场比赛里厢，只有颜骏凌是正常发挥额。所以，每趟国家队碰到大赛，尤其是世界杯预选赛唠啥，最重要个就是哪能平稳发挥，哪能稳定心态。

邻人又问：个么，搿趟国家队请来个新教练有勿有花头？

我只能苦笑：呵呵，花头么肯定有额咯……迭个伊万科维奇最早是克罗地亚国家队嗰助理教练，1998年世界杯就掿过第三名额。当时克罗地亚国家队个主教练就是后手来到申花队当主教练个老布，侬记勿记得？而且迭个伊万科维奇后头还做过伊朗队嗰主教练，带领伊朗队打进2006年世界杯。2010年伊还带过老山东掿了中超联赛冠军。水平肯定有个……但是迭趟请伊来带阿拉国家队辰光实在太紧，除了临时集训连得热身赛也呒没，只好走一步看一步来……

邻人叹一口气：唉，阿拉国家队哪能回事体啦？介许多年数，弄得来打新加坡搿种队也要让大家提心吊胆……

我：哪能办呢？只好讲亚洲其他球队侪进步了，日本韩国就勿谈了，最近十年连得东南亚球队也进步明显。而阿拉正好有十年呒没碰着新加坡了，对人家个情况完全勿了解。所以就更加心里厢呒没底了呀……

邻人若有所思：唉，勿管哪能，希望国家队好赢下来……

我：是呀，总归是癞痢头儿子自家好呀……