让路

娄一晨

前两天，老娄在小区里又遇到了那位邻居，就是那位一见到我就要聊足球的邻居。

邻居：哦哟，老娄啊，长远勿见啊，侬前两天蹲勒八万人现场讲球我看到来……

我微笑：侬也勒嗨现场？

邻居：是额呀，我看到侬立勒左面角球区附近采访两个球员呀……正好正好，今朝我也来采访一下侬老娄……哈哈哈……

我只好傻笑：喂，阿哥啊，阿拉做邻居交关辰光了，白相自家人勿作兴哦……

邻居：我就想问侬呀，乃么中超两轮踢好，接下去又要为国家队让路啦？

我点头：是额呀，接下去国家队勿是又要踢亚洲区预选赛了嘛，而且是客场踢沙特，主场踢澳大利亚，关键中额关键……侬看到预选赛积分榜吗？澳大利亚7分小组第二，阿拉中国队跟沙特巴林印尼侪是6分，大家脚碰脚。侬叫足协哪能选择？

邻居：我晓得是关键中额关键。但是我查过赛程表，阿拉国家队客场踢沙特要到3月20日来，今朝只有几号啦？侬中国足协3月2日就急勿煞捺联赛停脱了，接下去十几天辰光侬准备让迭点国家队朋友哪能来保持状态啦？简直就是瞎弄！

我：唉，老兄啊，侬讲了呒没错，但是哪能办呢？足协心里厢呒没底气、呒没信心呀……侬晓得阿拉国家队3号夜到已经飞到阿联酋去额消息吗？提早去，提早适应。阿拉假使也像日本队一样蹲勒亚洲一枝独秀，个么足协也就用勿着考虑联赛让路来……

邻居脱口接道：阿拉此地年年侪需要让路，国家队拨“让”出来啥好成绩吗？哦，侬联赛刚刚踢了两轮，搿眼国家队球员刚刚状态要出来，乃么侪一脚去来……状态是靠比赛比出来呃呀，单单靠训练靠得牢啊？

我只好苦笑：唉，老兄啊，每趟侪要提出来各种各样戳心经额问题，侬叫中国足协哪能来回答侬？

邻居沉默良久，又说：勿是讲要抄作业呀，但是，应该学习人家额地方就是应该去学呀……

我马上回到：讲句老实闲话，中国足球一直到今朝还勒嗨坚持走职业化联赛道路，让路是一直勒嗨让，但是，勿管哪能，呒没让到老早专业体工队额时代已经勿容易来……