亚冠又出局

娄一晨

前天夜里，老娄正在有一搭没一搭地看电视，某老友紧急来电。

老友：喂，娄啊，申花啥情况啦？亚冠又输脱啦？

我：看到来……踢勿过哪能办啦？本来就实力勿够，今朝还缺脱介许多人，朱辰杰、阿马杜、路易斯，一条中轴线侪呒没了……

老友：我晓得缺人呀，但是0比4有点难看相了。还有前头一天上港也是呃，开场1分半就拨人家逼抢断球，输得来一点脾气也呒没……唉，迭个两场球看得来我一包气，又浪费我两场钞票……

我：阿哥啊，算来，迭个只是小钞票……

老友：钞票是小事体，主要是心里厢挖煞……国家队现在踢勿过日本人也就算了，大家侪晓得差距大了勿得了。但是，俱乐部层面，大家个差距呒没介大呀，而且我看伊拉个外援能力也只好讲一般性。结果呢？拨人家一逼一抢，阿拉此地就弄勿来了，慌是慌得来……

我：老兄啊，侬又一针见血了呀……我伊天直播上港个辰光勿是讲呃嘛？同样侪是高位逼抢高位拦截，日本人经常可以通过连续传接、一脚传递形成摆脱转移，完成快速配合转换，迭个就是阿拉个差距呀……迭个生活需要啥啦？需要平常勒嗨阿拉自家个联赛里厢反复练习反复完成才能够提高呀！套用阿拉一直讲个老话，就是技不如人呀……

老友：又要技不如人啦？哪能介许多年数永远是搿四个字啦？侬好调几个新点介词语吗？

我只好苦笑：我也想调呃呀，实在是只有迭四个字最贴切呀……侬想呀，现在整个国际足球里厢，高位逼抢高位拦截快速转换是一种潮流，大家侪一道学习使用，啥人学了像，啥人用了熟练，啥人勿怕抢，啥人转换快，机会就是啥人多，进球也就啥人多……道理老简单呃，现在蹲了亚洲就是日本人学了最像，用了最熟练，最勿怕人家抢，转换速度最快，所以才会得有介许多日本球员受到欧洲俱乐部欢迎呀……

老友：唉，侬讲了呒没错，英超我一直看额，人家三球王是踢了好。搿种身体条件比阿拉个球员还差，但是人家照样能踢出来。据讲沙特联赛还看中伊，开高价，伊还勿肯去？

我：是呀，利雅得胜利，开价7500万英镑。

老友：疯脱了……再会……

突然想起了《繁花》第二集中的经典对话。阿宝小得意：时代进步了呀……爷叔脱口而出：但是侬退步了呀……