球市正火

娄一晨

前几天和中学同学聚会吃饭，不胜亲切。老兄弟中球迷不少，自然就聊起了眼下颇为火爆的中超球市。

G：老娄啊，今年申花队看额人哈多呀……主场多也就算了，连得去客场也有交关人啊……上个礼拜六客场打大连，新闻报道讲有得5000多个球迷专门从上海赶过去……结棍！

Q：是呀，我身边好几个朋友侪过去来……不过，伊拉帮我讲大连是今年球市最好额地方，每场比赛侪有60000多人进球场看球，凶额……

我：正常额！只要成绩上去，观众当然就愿意买票子。而且八万人场地大，位子要比虹口多交关来……大连也是一样，终于有得球队重新回到中超，当然应该起只蓬头咯……

G：我看到现在还有新闻掿中超上座率交国外联赛摆了一道做比较，好像阿拉已经排到亚洲第一了？是吗？

Q：啊？迭额生活也有排名啊？稍微有点无聊了吗？成绩踢勿过人家，靠观众上座率来撑面子？

我：哈哈哈，撑面子么有辰光也是需要额……但是，勿好只是为了撑面子……拨我讲起来，中超联赛上座率排了亚洲第一么是应该呃呀，毕竟阿拉国家介许多人口来……

Q：老娄啊，侬比赛看了多，尤其是外国比赛看了更加多。对比下来，侬觉着阿拉国内额球市算是健康发展吗？

我：嗯，迭额侬叫我哪能讲法？只好讲阿拉额职业联赛职业体育刚刚起步30年，还属于初级阶段。所以体育市场、体育经济，包括球市也只是属于初级阶段。人家国家白相职业体育已经100多年来，基础完全勿一样，呒没办法比较额……

G点头：是呀，光一只伦敦就有得英超球队七支，球市侪好得来……

我笑了：还勿止来，英超以下，低级别还有10支球队。足球以外，英式橄榄球队还有五支。

Q：介许多球队啊？伦敦有多少人口？侪活得下来啊？

我：欧美国家老百姓欢喜体育额程度阿拉真额难以想象。对伊拉来讲，少喫一顿饭覅紧，少看一场球绝对浑身勿适意哦……假使真额要捺上海来做比较额说话，外国人肯定会得觉着，佴2500万人口哎，个么申花队比赛应该是每场侪要超过10万人进场差勿多吗？

两位老兄弟愣了一下：10万人？阿拉现在啥地方去寻10万人额球场？