亚国联新鲜出炉

娄一晨

约了几位友人吃饭叙旧，聊起了国际足球资讯，有点意思。

友人A：娄啊，搿两天我看到新闻，讲亚足联要推出一只新额赛事，叫“亚洲国家联赛”，简称“亚国联”。迭额算啥比赛啦？阿拉中国队假使去参加，有花头吗？

友人B也跟着问：啊？中国队？估计是呒啥大花头。亚足联倒是花头蛮透额？啊是又想弄只新额比赛出来骗钞票是吗？

我：哈哈哈，侬老兄真结棍！一枪头戳到亚足联腰眼里去来，勿作兴呃！

B也笑：我是学习侬娄兄呀，要剥开表象看本质……

我：迭额生活呢，首先要帮侬介绍一下欧国联，也就是欧足联2018年推出来额国家队联赛。当时辰光，欧足联发觉勒嗨常规额欧洲杯预选赛搭之世界杯预选赛以外，各个国家额足协一直是自家寻人来组织友谊比赛……

A：好像历史廊一直是迭能操作呃呀，各人寻各人……

我：问题是欧足联看到商机闻着味道了呀……侬自家寻人自家联系自家操作是勿对呃！明显无组织无纪律嘛！而且，侬自家弄来弄去又弄勿出啥大花头，对吗？侬一场普通来兮额友谊比赛，商业价值有得多少啦？所以，欧足联当然要果断出手接管赛事！我捺侬搿点友谊比赛能拼呃全部拼了一道，弄成一只新额长期赛事，由我欧足联挂名——欧洲国家联赛！有腔调吗？有档次吗？格局一记头打开吗？

B：打开侬只魂灵头！勿仍旧是国家队友谊比赛啊？

我大笑：哈哈哈，比赛性质还是有变化呃……侬老早只是一场一场单独额友谊比赛，输赢结果勿搭界，商业价值么一眼眼。现在呢？我捺侬全部拼起来，变成一只跨年度额，带有相当程度额锦标赛性质，乃么输赢结果额价值啊是就勿一样了啊……对吗？

A：好像有点道理……

我：勿是有一点点道理！商业赞助、版权买卖、广告销售一道爆发。欧国联从2018年9月创办，两年一届，已经办了四届了。

B：个么亚足联推出亚国联就是要复制粘贴欧国联咯？

我：迭额是肯定呃……想办法掿蛋糕做大呀……

A：个么做得大吗？欧洲亚洲两桩事体好吗……

我：兄弟啊，迭额侬就覅操心来……亚足联有想法学习欧洲总勿是啥坏事体，侬就只当是观众看白戏，OK？反正，虚胖也是胖，浮肿也是肿……

三人大笑。