老司机，脾气犟

娄一晨

前两天吃完晚饭出门倒垃圾，遇到小区里熟识的那位邻居，又聊起足球话题。这次当然聊的是申花队和斯卢茨基。

邻居：老娄啊，正好是想问侬呀，申花队啥情况啦？伊个老司机就勿做啦？

我叹了一口气：唉，是呀，老司机三连败，赛后新闻发布会直接宣布跑路来……

邻居：伊勿是去年刚刚续约，要到明年年底再到期，哪能讲跑路就跑路啦？脾气倒也是蛮犟呃嘛？后头一年多个钞票侪覅啦？

我：迭个侬叫我哪能讲呢？只好讲人家俄罗斯大牌教练，爱惜自家名声，哪怕做了再勿开心也勿想拨外头人讲伊贪心，所以也勿帮侬俱乐部搞七捻三，直接辞职回去，大家勿留啥后遗症……

邻居：唉，可惜了，老司机……上半年联赛开局申花队情况还是蛮好呃呀，6胜2平。要勿是今年拨足协扣脱10分，联赛排名估计就完全勿一样来……

我：迭个就勿谈来……老司机带申花队三个赛季，每个赛季开局侪好呃……侬想想看去年搿歇辰光，排名第一，领先6分，结果呢？去年8月2日客场拨云南打成3比3，8月9日德比战输拨海港。仅仅两轮过脱，6分优势就只剩1分来……今年也是，开局6胜2平，接下来5月7轮联赛3平4败……所以，大家对老司机意见最大个一点就是联赛关键时刻顶勿牢，一枪头崩脱……迭个生活啥人吃得消？

邻居：迭个……也勿好全部怪了伊头廊厢？

我：当然勿好讲侪是伊额责任，客观因素也有交交关，比如讲球队出现严重伤病问题，中足联赛程安排搭进搭出，6月开始大热天高温影响……但是，搿眼问题又勿是今年第一趟碰着，每年侪碰着呃呀！个么侬作为主教练哪能办呢？总应该有备用方案，连得球迷也看出来侬老司机就欢喜一套阵容往死里厢用呀……

邻居：勿管哪能，我还是觉着老司机来了以后带拨申花队交关变化，交关进步呃……

我：呒错！老司机让申花队攻防转换速度明显加快，前场逼抢额力度明显加强，其他球队明显勿适应。所以侬看申花队最近几年有多少场比赛光是射门次数就要接近30次，迭个就是国内赛场廊厢少有个进步。另外，前场定位球个设计、跑位、执行，变化丰富，效果明显。

邻居：个么俱乐部为啥勿多拨老司机一点辰光啦？

我：老兄啊，老司机脾气介犟，发布会廊厢自家宣布，侬觉着俱乐部拉得牢伊啊？现在迭能介处理，大家好聚好散，也算是一只句号勿难看……还要哪能？