冠军阻击从来就是一场接力赛

娄一晨

前两天又在小区里遇到那位相谈甚欢的邻居。

邻居：老娄啊，礼拜天夜到看到侬讲球来，蹲了上港现场，佴三介头。比赛蛮好看呃……就是成都有点作孽，哦？掿1分就好掿冠军，结果1分也掿勿着……

我：成都只好怪自家勿好，9月头廊厢就可以夺冠来……当时辰光领先第二名十几分，大家侪勒嗨讨论到底提前几轮掿冠军……乃么好来，现在弄得来只领先6分，下一轮回到主场还要拼大连……唉，算啥名堂？

邻居：是额呀，到底啥情况啦？我看网廊厢交关人侪讲成都今年假使冠军捞勿着，搿记笑话真个要大到天廊厢去来！介许多强队侪拨扣分，只有伊勿扣分，结果硬劲要自家作，作天作地，一路作到现在……

我：阿哥啊，作天作地勿至于……只好讲人家下半赛季是呒没打好……但是呢，迭个生活也是跟联赛赛程安排有关系。今年因为有世界杯，所以阿拉联赛从5月31日开始休息，一路休到6月19日。侬想想看，成都上半年状态多少好？搿记一休息么状态全部呒得来……接下去就是整个7月，成都五连平……里厢好几场侪是差一眼眼就走脱噢……

邻居点头：嗯，对呃……不过，我有只问题呀，为啥下半赛季里厢有介许多球队排好队阻击成都啦？包括申花客场5比4赢伊拉，成都做人呒做了介差吧？

我大笑：哈哈哈，排队阻击多少好白相？像田径比赛4×100接力交接力棒一样……从申花开始一路交下来，交到河南、天津、上港，下一轮交拨大连……有一段辰光礼拜天赛后球场外头额视频侬看到了吗？我笑煞脱了：有一个大连球迷蹲了上港球场外头感谢上港球迷，激动得来戆笑，闲话也讲勿清爽……上港球迷好几个一面帮伊握手一面讲“交给你们咯，看你们咯……”

我接着说：阿拉刘越老师也已经讲来，假使下一轮大连再阻击成功，末脚一轮山东主场对成都，伊申请到济南现场去见证历史！哈哈哈……

邻居：老娄啊，个么侬觉着成都到底掿得着冠军吗？难道真个要拨大连反超上来？

我：应该勿会吧，成都还是实力要强交关呃……但是现在我也已经有点抖豁了……问题主要还是出了心态高头……连牢勿赢，连牢拨阻击，从球员到教练侪要出心理阴影呃呀……不过呢，闲话再讲转来，要掿冠军，心理迭一关必须要过，否则就配勿上冠军奖杯！