养小麻雀

文/龚敏迪

上世纪60年代，弄堂里有好几家人家养鸟，阿拉搿点小朋友也侪想养只小麻雀当宠物。后来看到清朝宫廷画家冷枚个《百子图》里有一个养小麻雀嗰，才晓得搿也是传统童戏。

初生个小麻雀全身通红，头大颈细，邪气难看，一有动静就张开黄颜色个嘴巴要物事吃。吃饱了就困，要不了多久，羽毛就一眼眼长出来了，好像一只绒球，变得可爱起来。等到翅膀浪个毛长得差勿多了，就要让伊学飞了，轻轻往空中一抛，伊就会张开翅膀扑腾几下。

养了小麻雀，出门寻其他小朋友白相，总要带伊一道去。放辣上衣口袋里，小麻雀也晓得要注意卫生，勿过一旦掏出来，看到亮光，小麻雀往往会拉屎，所以掏个辰光要注意。再过些辰光，只要拿伊抛向空中，小麻雀就会飞到手臂浪。搿辰光是最得意，也是别人最羡慕嗰。

再养下去伊就想要寻找自由了，养辣笼子里不停跳来跳去，侬忍不住要放伊出来。窗台浪经常放点食物，伊就会带仔一群麻雀来凑热闹，其他小朋友则以观察伊拉个神态为乐。