大戏院里笑声再起

文/黄政一

南京路步行街北面有一条勿起眼个牛庄路，牛庄路浪有一家中国大戏院，从1930年建成开业到今年已经有90年了。伊第一只名字叫“三星舞台”，主营京剧演出，几年下来与“文明大舞台”“天蟾舞台”“共舞台”一道，成为上海京剧舞台个“四大天王”。勿过，对我来讲，中国大戏院是与独脚戏挂钩嗰。

独脚戏是以上海话为主体语言个曲艺节目，阿拉搿点上海小囡侪是听独脚戏长大嗰。记得小学高年级开始学英文，先认得了ABC……26个字母，学会了英文“侬好”“侬几岁了”“侬叫啥个名字”，然后越学越多，背起来也是越来越吃力，有点顾此失彼，前学后忘记个感觉。后来勿晓得啥人发明了一种奇奇怪个背单词办法，比如英文单词Picture，伊拉就用“皮鞋新店有阿姨”来记，一下子就记牢了，侬讲绝口伐？阿拉侪叫伊“洋泾浜”升级版。再后来听姚慕双、周柏春表演个独脚戏《学英文》，伊拉两家头学英文居然是靠“剥了皮吃”“吐了核吃”“捏勿牢滑脱”来记嗰，才晓得“祖师爷”原来辣搿搭，而且周伯伯还能邪气潇洒个拿26个英文字母倒过来背，让阿拉搿点小朋友真心佩服。

我第一趟走进中国大戏院是三十几年前，一个冬天个下半天。我跟仔何国忠先生走进了戏院后台，勿但看到了“碰碰响”个女双档张小玲、许海俐，还碰着王汝刚、李九松两位先生，收到了伊拉个名片。李老个名片黑颜色烫银字，拨我个印象特别深，收藏至今。当时独脚戏是老戏新戏轮番亮相，戏院里整体笑声勿断，让上海个戏迷十十足足过了一把瘾。可惜我搭仔伊拉个合作呒没谈成功，有点遗憾。

十多年后，我又碰着王汝刚先生，送了伊一本我做个书，趁热打铁拿出王先生当年拨我个名片请伊签名留念。伊接到名片一看，马上甩出一句“这张名片老口来”，欣然签名，写上手机，还拿原来七位数个单位电话改为八位数。

2005年，中国大戏院拨确定为“上海市优秀历史建筑”。2012年开始改造修缮改造。经过6年精心打磨，2018年再次开门迎客。

等我再次走进中国大戏院，已经勿认得搿位90岁个“老太爷”了，实在是太漂亮，太时尚了。大幕拉开，两个年龄加起来130岁个上海爷叔身穿蓝西装，头势煞清，皮鞋锃亮，走上舞台，伊拉身后个布景里中间是现代化个浦东陆家嘴，左右是两幢老上海石库门。两位爷叔围绕上海文化、上海制造、上海服务、上海购物“四大品牌”尽情发挥，教育、高铁、互联网、动迁、楼市、大数据……内容丰富，讲到上海小囡讲勿来上海话，“毛豆”儿子拿“出生证”讲成“畜牲证”，气得阿爸眼冒金星……两位爷叔一口气讲了一个多钟头，上半场结束，主持人爆料，据统计上半场现场观众笑了三百多次。两位爷叔辣台浪演得尽心尽力，八百多位观众辣台下笑得心情舒畅。

散场经过售票处，值班经理面熟陌生，顺口问了一句：“搿是第几场演出啊？”回答：“第60场。”噢哟，倒是一个邪气圆满个数字，说明阿拉运道蛮好。